پروفیسر ڈاکٹر حسن محی الدین قادری کا ایبٹ آباد جلال بابا آڈیٹوریم میں میلادِ مصطفیٰ ﷺ کانفرنس سے خطاب
ایمان کی تکمیل عشقِ مصطفیٰ ﷺ کے بغیر ممکن نہیں: پروفیسر ڈاکٹر حسن محی الدین قادری
منہاج القرآن انٹرنیشنل کی سپریم کونسل کے چیئرمین پروفیسر ڈاکٹر حسن محی الدین قادری نے جلال بابا آڈیٹوریم میں منعقدہ میلادِ مصطفیٰ ﷺ کانفرنس سے خطاب کرتے ہوئے کہا کہ اللہ تعالیٰ کا فرمان ہے: نبی ﷺ مومنوں کے لیے ان کی جانوں سے بھی زیادہ قریب ہیں۔ انہوں نے کہا کہ اگر کوئی شخص آقا ﷺ سے والہانہ محبت کا رشتہ قائم کر لے تو وہ کبھی گمراہ نہیں ہو سکتا۔ ایمان کا کمال اسی وقت حاصل ہوتا ہے جب انسان نبی کریم ﷺ کی اطاعت اور ان کے ہر فرمان پر عمل کو اپنی زندگی کا مقصد بنا لے۔ حضور ﷺ کی تعظیم و ادب ایمان کی بنیاد ہے، کیونکہ جس کے دل میں آقا ﷺ کا ادب نہیں، اس کا ایمان مکمل نہیں۔
ڈاکٹر حسن محی الدین قادری نے کہاکہ حضرت عمر بن الخطاب رضی اللہ عنہ نے ایک روز حضور ﷺ سے عرض کیا: یارسول اللہ! میں آپ سے اپنے والدین سے زیادہ محبت کرتا ہوں مگر اپنی جان سے زیادہ نہیں۔ حضور ﷺ نے فرمایا: عمر! پھر تیرا ایمان مکمل نہیں۔ نبی کریم ﷺ نے اپنے دستِ مبارک حضرت عمر رضی اللہ عنہ کے سینے پر رکھا تو ان کی کیفیت بدل گئی۔ عرض کیا: یارسول اللہ! اب آپ مجھے اپنی جان سے بھی زیادہ محبوب ہیں۔ آپ ﷺ نے فرمایا: اب تیرا ایمان کامل ہو گیا۔
انہوں نے کہا کہ محبت ان سے کی جاتی ہے جن کی قربت سے روح کو سکون ملے اور دل کو قرار حاصل ہو۔ حضور ﷺ کے حسن و جمال، ان کی عقل و دانائی، ان کے رُخِ انور اور گفتار میں وہ انفرادیت ہے جو کسی اور کے پاس نہیں۔ اللہ کا محبوب سراپا محبت ہے اور ایمان کی تکمیل اسی وقت ہوتی ہے جب بندہ اللہ کے محبوب ﷺ سے محبت کرے، ان کے حکم کو تسلیم کرے، ان کے ہر قول و فعل کو راہِ نجات سمجھے۔
انہوں نے کہا کہ قرآنِ مجید سراپا محبتِ مصطفیٰ ﷺ ہے۔ اللہ نے اپنے محبوب کی عظمت بیان کرنے کے لیے بارہا ان کی قسمیں کھائیں۔ قرآن کی الحمد سے والناس تک اللہ نے اپنے محبوب ﷺ کی رفعت و شان کا ذکر فرمایا۔ آقائے دو جہاں ﷺ کا نام، ان کی اطاعت، ان کی تعلیمات اور ان کا کردار آج بھی زندہ جاوید ہیں۔ زمانے بدل گئے مگر حضور ﷺ کا فرمان آج بھی حق ہے، ان کی سنت آج بھی روشنی ہے۔
ڈاکٹر حسن محی الدین قادری نے مذید کہا کہ نبی کریم ﷺ ہر پہلو سے کامل اور بے مثال ہیں۔ چاہے وہ عبادت ہو یا تجارت، عدل ہو یا سخاوت، گفتار ہو یا کردار—آپ ﷺ ہر میدان میں کمال کا نمونہ ہیں۔ آپ ﷺ کے گزرنے سے خوشبوؤں کی لہریں چل پڑتیں، آپ ﷺ کا پسینہ خوشبو سے بڑھ کر خوشبو بن جاتا۔ آپ ﷺ کی سخاوت ایسی تھی کہ جو زیادہ مانگتا، آپ اس پر ناراض ہونے کے بجائے خوش ہوتے۔ انہوں نے فرمایا کہ نبی اکرم ﷺ نے کبھی کسی کو برائی کا جواب برائی سے نہیں دیا۔ آپ ﷺ کے اخلاقِ حسنہ سے متاثر ہو کر ہزاروں لوگ ایمان لائے۔ حضرت عیسیٰ علیہ السلام نے فرمایا تھا کہ جب نبی آخرالزماں ﷺ تشریف لائیں تو ان پر میرا سلام کہنا—یہ وہ نبی ہیں جن پر انبیاء کرام نے سلام بھیجا۔
ڈاکٹر حسن محی الدین قادری نے افسوس کا اظہار کرتے ہوئے کہا کہ آج امتِ مسلمہ نبی کریم ﷺ کی سیرتِ طیبہ اور اخلاقِ حسنہ سے بہت دور جا چکی ہے۔ حسد، ریاکاری، خود پرستی اور تکبر نے ہماری روحانیت کو زنگ آلود کر دیا ہے۔ ہم دعویٰ تو کرتے ہیں کہ ہم حضور ﷺ کے امتی ہیں، مگر ان کے احکامات پر عمل نہیں کرتے۔ انہوں نے کہا کہ اگر ہم واقعی عشقِ مصطفیٰ ﷺ کے سچے دعویدار ہیں تو ہمیں ان کے اخلاق، ان کی سیرت، ان کے ادب اور ان کی محبت کو اپنی زندگیوں میں لانا ہوگا۔ جب تک دلوں میں نبی کریم ﷺ کا ادب اور عشق پیدا نہیں ہوگا، نہ عبادت قبول ہوگی اور نہ ایمان مکمل ہوگا۔
تقریب میں ناظم اعلیٰ منہاج القرآن انٹرنیشنل خرم نواز گنڈاپور، ممبر قومی اسمبلی شہزادہ گشتاسب، محمد جاوید ہزاروی، سجادہ نشین آستانہ عالیہ چھتڑی شریف سید محبوب شاہ کاظمی، سجادہ نشین آستانہ عالیہ طوری شریف سید احمد شاہ، سید امجد علی شاہ، شیخ فرحان عزیز، لبنیٰ مشتاق، جویریہ افضل، عائشہ مشتاق، علامہ سید زین العابدین، سید عابد شاہ ترمذی، سید نور افضل شاہ، پیر سید اظہر شاہ، ڈاکٹر جہانگیر عباسی، حاجی غلام شبیر، راجہ وقار احمد، سید ثاقب شاہ، کامران سہیل ایڈووکیٹ، نصیر خان جدون، نثار احمد سلیمانی، راجہ ظہیر عباس، جمیل صابر سمیت تحریک منہاج القرآن ایبٹ آباد کے جملہ فورمز کے کارکنان و ذمہ داران اور خواتین و حضرات کی کثیر تعداد شریک تھی۔
تبصرہ