پروفیسر ڈاکٹر حسن محی الدین قادری کا یونیورسٹی ٹاؤن ایبٹ آباد میں ضیافتِ میلاد ﷺ سے خطاب

چیئرمین سپریم کونسل منہاج القرآن انٹرنیشنل، پروفیسر ڈاکٹر حسن محی الدین قادری نے یونیورسٹی ٹاؤن ایبٹ آباد میں صاحبزادگانِ سید غلام علی شاہ کاظمی کی رہائش گاہ پر منعقدہ ضیافتِ میلاد ﷺ کی روح پرور تقریب سے خطاب کرتے ہوئے کہا کہ ہر نیک عمل خالصتاً اللہ تعالیٰ کی رضا کے لیے ہونا چاہیے، کیونکہ نیت ہی عمل کی قبولیت کی بنیاد ہے۔

انہوں نے کہا کہ امت میں اختلاف دراصل رحمت ہے، تفرقہ نہیں۔ اختلافِ رائے وسعتِ نظر اور برداشت کو جنم دیتا ہے۔ بدقسمتی سے ہم اپنی توانائی اس بات پر صرف کر دیتے ہیں کہ میری رائے ہی درست ہے، حالانکہ اصل ضرورت دین کی خدمت، اصلاحِ نفس اور حسنِ عمل کی ہے۔

ڈاکٹر حسن محی الدین قادری نے فرمایا کہ شیخ الاسلام ڈاکٹر محمد طاہرالقادری کا پیغام امت میں علم، برداشت اور وحدت کو فروغ دینا ہے۔ منہاج القرآن کا مشن ہے کہ امت کو تفرقہ سے نکال کر علم و رواداری کے رنگ میں رنگا جائے تاکہ اسلام کا حقیقی چہرہ دنیا کے سامنے آئے۔

تقریب میں ناظمِ اعلیٰ منہاج القرآن انٹرنیشنل خرم نواز گنڈاپور، جاوید ہزاروی، سید محبوب شاہ کاظمی، مفتی زین العابدین، سید امجد علی شاہ، نثار احمد سلیمانی، صاحبزادگانِ سید غلام علی شاہ کاظمی، اور مختلف مذہبی، سماجی، کاروباری و صحافتی شخصیات کی بڑی تعداد نے شرکت کی۔