پروفیسر ڈاکٹر حسن محی الدین قادری کا واہ کینٹ میں ورکرز کنونشن سے خطاب
چیئرمین سپریم کونسل منہاجُ القرآن انٹرنیشنل، پروفیسر ڈاکٹر حسن محی الدین قادری نے واہ کینٹ میں تحریکِ منہاجُ القرآن راولپنڈی شمالی کے زیرِاہتمام ورکرز کنونشن سے خطاب کرتے ہوئے کہا کہ حضور نبی اکرم ﷺ نے فرمایا: ’’بہترین شخص وہ ہے جو دوسروں کے لیے نفع مند ہو‘‘۔ یہی حدیث حقیقی قیادت کی تعریف ہے۔ لیڈر وہ ہوتا ہے جو اپنی ذات کے لیے نہیں، دوسروں کے لیے جیتا ہے۔
انہوں نے کہا کہ لیڈر وہ ہے جو دوسروں کی خدمت کو اپنا شرف سمجھے، جو دلوں کو جوڑے۔ نبی کریم ﷺ نے اپنے عمل سے یہی مثال قائم کی، کہ خدمت، محبت اور عفو و درگزر ہی قیادت کی بنیاد ہیں۔ لیڈر حسد سے پاک، وسیع ظرف اور بلند اخلاق کا پیکر ہوتا ہے۔ جو دوسروں کی خامیاں تلاش کرنے کے بجائے ان کی اصلاح اور بہتری چاہے۔ انہوں نے کہا کہ شیخ الاسلام ڈاکٹر محمد طاہرالقادری دامت برکاتہم العالیہ حقیقی معنوں میں امتِ مسلمہ کے قائد ہیں، جنہوں نے حضور نبی اکرم ﷺ کی تعلیمات کی سمجھ عطا کی، علم و عمل کا پیغام دیا اور فتنۂ خوارج کے خلاف جرات مندانہ فتویٰ دے کر امت کو متحد کیا۔ آخر میں انہوں نے کارکنان کو نصیحت کی کہ وہ علم، برداشت اور محبت کے فروغ کو اپنی زندگی کا مشن بنائیں، جھگڑوں سے بچیں، اور گھروں کو علم و اخلاق کے مراکز بنائیں تاکہ معاشرہ حقیقی معنوں میں مصطفوی معاشرہ بن سکے۔
تقریب کے اختتام پر انہوں نے مصطفوی سٹوڈنٹس موومنٹ کے یوم تاسیس کا کیک بھی کاٹا اور بہترین کارکردگی پر منہاج القرآن کے جملہ فورم کے عہدیداران کو اعزازی شیلڈ اور سرٹیفیکیٹس بھی دیئے۔
تقریب میں نائب ناظمِ اعلیٰ تنظیمات انجینئر محمد رفیق نجم، سید محمود الحسن جعفری، چوہدری عرفان یوسف، شیخ فرحان عزیز، انار خان گوندل، قاضی خرم شہزاد، صغیر خان، علامہ مقصود ایوب، سید گفتار حسین شاہ ایڈووکیٹ، عظیم عثمانی، احمد شیراز، محمد جاوید، سردار اویس گجر، لبنیٰ مشتاق، باجی ارشاد اقبال، جویریہ افضل، سمیرہ شفیق، رابعہ مظہرسمیت شہر بھر سے آئے ہوئے کثیر تعداد میں مرد و خواتین نے شرکت کی۔
پروفیسر ڈاکٹر حسن محی الدین قادری کی ورکرز کنونشن میں آمد
تبصرہ