منہاج القرآن ویمن لیگ کے زیرِاہتمام سیدہ زینب سلام اللہ علیہا کانفرنس

اہل بیت اطہارعلیہم السلام کی پاکیزہ زندگیوں کو اپنانا اصل محبتِ اہل بیت علیہم السلام ہے
کانفرنس سے خرم نواز گنڈا پور، خانم طیبہ نقوی، حمیرا بھٹو، لبنیٰ مشتاق، ڈاکٹر فاروق رانا، ڈاکٹر عظمیٰ کا خطاب

لاہور (26 جولائی 2025) منہاج القرآن ویمن لیگ کے زیراہتمام سیدہ زینب سلام اللہ علیہا کانفرنس کا انعقاد مرکزی سیکرٹریٹ ماڈل ٹاؤن لاہور میں کیا گیا۔ ناظم اعلیٰ منہاج القرآن خرم نواز گنڈا پور نے کانفرنس سے خطاب کرتے ہوئے کہا کہ سیدہ زینب سلام اللہ علیہا کربلا میں صبر، استقامت کی مثال بنیں جو قیامت تک آنے والی خواتین کے لئے رول ماڈل ہیں۔ ان کا مزید کہنا تھا کہ سیدہ زینب سلام اللہ علیہا کا کردار آج کی ہر بیٹی اور ہر بہن کے لیے ایک مثالی نمونہ ہے۔

کوارڈی نیشن کمیٹی کی ہیڈ لبنیٰ مشتاق نے خطاب کرتے ہوئے کہا کہ امت کی نجات کا راستہ قرآن اور اہل بیت علیہم السلام سے محبت میں ہے۔ اہل بیت اطہار علیہم السلام کا مقام و مرتبہ نہایت بلند ہے۔ واقعہ کربلا میں سیدہ زینب سلام اللہ علیہا نے عظیم حوصلے اور صبر کا مظاہرہ کیا۔ اور یزید کے دربار میں ظلم و جبر کے خلاف ڈٹ کر خطبہ دیا۔

ڈائریکٹر فرید ملت ریسرچ انسٹیٹیوٹ ڈاکٹر رانا فاروق نے اپنے خطاب میں کہا کہ سیدہ زینب سلام اللہ علیہا عظمت اور استقامت کا پیکر تھیں۔ آپ سلام اللہ علیہا ظلم کے سامنے سیسہ پلائی ہوئی دیوار بن گئیں، ایک ناقابلِ تسخیر قلعہ کی مانند کھڑی رہیں۔ انہوں نے کہا کہ اہلِ بیت سے محبت قرآن کا حکم ہے۔ صرف نعرے لگانا کافی نہیں، بلکہ اہلِ بیت اطہارکے کردار کو اپنی عملی زندگی میں اپنانا ہی حقیقی محبت ہے۔

پروفیسر ڈاکٹر عظمی زریں نے کہا کہ سیدہ زینب سلام اللہ علیہا کربلا کی غازی ہیں۔ سیدہ زینب سلام اللہ علیہا نے واقعہ کربلا میں حق گوئی اور جرأت سے لوگوں کے منہ بند کر دیے اہلِ بیتؑ حق پر ڈٹ کر کھڑے رہے اور باطل کے خلاف ڈٹ کر لڑے۔ حمیرا بھٹو نے خطاب کرتے ہوئے کہا کہ واقعہ کربلا سیدہ زینب سلام اللہ علیہا کی زندگی کا سب سے کڑا اور کربناک مرحلہ تھا، جس کا سامنا انہوں نے بے مثال صبر، استقامت اور خندہ پیشانی سے کیا۔ ان کی شجاعت و جرأت کا اندازہ اس بات سے لگایا جا سکتا ہے کہ انہوں نے یزید کے دربار میں حق کا پرچم بلند کرتے ہوئے اسے للکارا۔

خانم طیبہ نقوی نے کہا کہ سیدہ زینب سلام اللہ علیہا نے واقعہ کربلا میں جس جرات، حکمت اور وقار کا مظاہرہ کیا، وہ تاریخِ انسانیت میں بے مثال ہے۔ یزید کے دربار تک آپ کا کردار کسی بھی مقام پر کمزوری یا مایوسی کا اظہار نہیں کرتا۔ حافظہ سحر عنبرین نے اپنے خطاب میں کہا کہ سیدہ زینب سلام اللہ علیہا نے صبر و استقامت کے ساتھ یزیدیت کے خلاف حق کی صدا بلند کی۔آپ سلام اللہ علیہا کا پیغام رہتی دنیا تک اسلام کے تحفظ اور احیاء کی ضمانت بن گیا۔

کانفرنس میں نائب ناظمین اعلیٰ انجینئر رفیق نجم،بریگیڈیئر (ر) عمر حیات، منہاج القرآن ویمن لیگ کی، ارشاد اقبال، صائمہ نور، سحر عنبرین، عائشہ بتول، کلثوم قمر، حناء فاطمہ، رابعہ شفق، حراء دلبر اعوان، اقراء مبین، مسز مفتی غلام اصغر صدیقی، مسز آصف اکبر قادری، قاریہ کلثوم، بشریٰ رضوان، مسزقاری منیر، سیدہ نورالعین نقوی، زکیہ فاطمہ اور دیگر خواتین رہنماؤں نے شرکت کی۔