شیخ الاسلام ڈاکٹر محمد طاہرالقادری کے والد گرامی، فریدِ ملت ڈاکٹر فریدالدین قادریؒ کے 52 ویں عرس مبارک کی تقریب و ’’فرید ملت سیمینار‘‘ کا ا

بانی و سرپرستِ اعلیٰ تحریک منہاج القرآن شیخ الاسلام ڈاکٹر محمد طاہرالقادری کے والد گرامی، فریدِ ملت ڈاکٹر فریدالدین قادری رحمۃ اللہ علیہ کے 52 ویں عرس مبارک کی تقریب دارالعلوم فریدیہ قادریہ، ملحقہ درباد فریدِ ملت، بستی لوہلے شاہ، جھنگ صدر میں ہوئی۔ عرس کے موقع پر ’فرید ملت سیمینار‘ کا انعقاد کیا گیا، جس میں پاکستان بھر سے مشائخ عظام اور علمائے کرام سمیت مختلف شعبہ ہائے زندگی اور مکاتبِ فکر سے تعلق رکھنے والی شخصیات نے بڑی تعداد میں شرکت کی۔سیمینار میں ڈاکٹر فرید الدین قادری رحمۃ اللہ علیہ کی اسلام، پاکستان اور شعبہ طب کیلئے انجام دی گئی خدمات پر انہیں زبردست خراج تحسین پیش کیا گیا۔

سیمینار کی صدارت متولی دربار فرید ملت صاحبزادہ محمد صبغت اللہ قادری نے کی، جبکہ تحریک منہاج القرآن کے نائب ناظم اعلیٰ نور اللہ صدیقی، برگیڈیئر ر عمر حیات، رانا محمد ادریس قادری، محمد جواد حامد، ناظم اعلیٰ نظام المدارس پاکستان ڈاکٹر میر آصف اکبر قادری، علامہ عین الحق بغدادی، غلام مرتضیٰ علوی، عبدالرحن ملک، علامہ اشفاق علی چشتی، حافظ عبدالقدیر قادری، شہزد رسول، پروفیسر ذوالفقار علی، علامہ رانا نفیس حسین قادری، حافظ عابد بشیر، علامہ مدثر رسول نوری، سعید اختر، شیخ آفتاب، غلام فرید عاجز سمیت تحریک منہاج القرآن اور پاکستان عوامی تحریک کے مرکزی، صوبائی اور ضلعی رہنماؤں نے خصوصی شرکت کی۔

’فرید ملت سیمینار‘ کا آغاز نجم القرا قاری نور احمد چشتی کی تلاوتِ کلامِ مجید سے ہوا جس کے بعد تاجدار کائنات صلیٰ اللہ علیہ وآلہ وسلم کی بارگاہ میں گلہائے عقیدت پیش کیے گئے جس کی سعادت الحاج محمد افضل نوشاہی، ظہیر بلالی برادران، شکیل احمد طاہر، شہزاد برادران، فرید نعت کونسل جھنگ اور دیگر نعت خواں حضرات نے حاصل کی۔

اس موقع پر علامہ صاحبزادہ ظہیر احمد نقشبندی نے خطاب کرتے ہوئے کہا کہ شیخ الاسلام ڈاکٹر محمد طاہرالقادری دامت برکاتہم العالیہ کے والدِ گرامی ڈاکٹر فرید الدین قادری رحمۃ اللہ علیہ نہ صرف سلوک و طریقت اور شریعت کے علوم میں کمال مہارت رکھتے تھے بلکہ جدید علوم پر بھی گہری نگاہ رکھتے تھے۔ وہ ایک بلند پایہ عالم اور انسانیت دوست شخصیت کے حامل تھے۔ جب اللہ تعالیٰ کا خاص فضل و کرم کسی بندے پر ہوتا ہے تو اُس پر علم و عرفان اور روحانی برکتوں کے دروازے کھل جاتے ہیں۔ ڈاکٹر فرید الدین قادری رحمۃ اللہ علیہ زہد، تقویٰ اور اخلاص کا عملی نمونہ تھے۔ آج اُن ہی کے اسم گرامی سے منسوب فریدِ ملت ریسرچ انسٹی ٹیوٹ دنیا بھر میں علم، حکمت اور روحانیت کی خوشبو بکھیر رہا ہے، اور ہزاروں لوگ اس کے علمی خزانوں سے فیض حاصل کر رہے ہیں۔

سمینار کے اختتام پر حضور شیخ الاسلام نے بذریعہ ویڈیو لنک دعا کروائی۔