ناکافی شہادتوں کے باعث دہشت گردوں کی رہائی کے سلسلہ پر عوام کو تشویش ہے : ڈاکٹر رحیق احمد عباسی

چیف جسٹس سپریم کورٹ اس حساس مسئلے پر سوووموٹو ایکشن لیں

تحریک منہاج القرآن کے ناظم اعلیٰ ڈاکٹر رحیق احمد عباسی نے دہشت گردی کی سنگین وارداتوں میں ملوث افراد کی ناکافی شہادتوں کے باعث رہائی کے سلسلہ پر تشویش کا اظہار کرتے ہوئے چیف جسٹس سپریم کورٹ سے اپیل کی ہے کہ وہ اس حساس مسئلے پر سوووموٹو ایکشن لے کر کارروائی کریں۔ انہوں نے کہا کہ دہشت گردی میں ملوث ملزموں کی رہائیاں دہشت گردوں کو کھلی چھٹی دینے کے مترادف ہے۔ ملکی امن کو سبوتاژ کر کے معصوم جانوں سے کھیلنے والے کسی رعائیت کے مستحق نہیں ہیں۔ دہشت گردوں کو پکڑنا اور ان کے خلاف ٹھوس ثبوت پیش کرنا قانون نافذ کرنے والے اداروں کی اولین ذمہ داری ہے۔ ثبوتوں کے حوالے سے ہونے والی کوتاہی پر چیف جسٹس قانون نافذ کرنے والے اداروں سے باز پرس کریں۔ انہوں نے کہا کہ انسانی جانوں اور ملکی امن سے کھیلنے والوں کو صرف اس لیے چھوڑ دینا کہ شہادتیں ناکافی ہیں درست نہیں ہے ایسے رویے کو عوام قطعا قبول نہیں کریں گے۔ ڈاکٹر رحیق احمد عباسی نے کہا کہ دہشت گردوں کی رہائی کی خبروں سے پاکستان کے امیج کو مزید دھچکا لگے گا اس لیے اعلیٰ عدالت اس حساس مسئلے کے حل کے لیے اپنا کردار ادا کرے۔