سیاسی پارٹیوں پر شخصی اور خاندانی آمریت کا راج ہے۔ شیخ زاہد فیاض

عوام شعور کی آنکھ کھولیں اور نظام انتخاب کی تبدیلی کیلئے اپنے کردار کو پہچانیں

تحریک منہاج القرآن کے سینئرنائب ناظم اعلیٰ شیخ زاہد فیاض نے کہا ہے کہ جمہوریت پر شکوہ عمارات اور اسمیں بیٹھنے والے چند سیاسی خاندانوں کا نہیں بلکہ اس مسلسل عمل کا نام ہے جس میں عوام ہی میں سے باکردار، اہل اور دیانتدار لوگ عوامی مسائل حل کرنے کیلئے نہ صرف قانون سازی کرتے ہیں بلکہ اداروں کو استحکام دینے اور ملک کو ترقی کی طرف گامزن رکھنے میں اپنا کردار ادا کرتے ہیں۔ وہ گذشتہ روز پاکستان عوامی تحریک صوبہ سندھ کے صدر ایس ایم ضمیر کے ساتھ ٹیلی فونک گفتگو کر رہے تھے۔

انہوں نے کہا کہ پاکستان میں سیاسی پارٹیوں پر شخصی اور خاندانی آمریت کا راج ہے۔ منشور نام کی کسی چیز کا وجود سیاست میں نہیں، الیکشن لڑنے کا حق صرف چند خاندانوں کو ہے، موجودہ انتخابی نظام میں کروڑوں روپے کی انویسٹمنٹ ایک حلقے کیلئے درکار ہے، برادری ازم، غنڈہ گردی اور الیکشن ڈے مینجمنٹ اہم کردار ادا کرتی ہے۔ اہلیت، قابلیت، ملک سے وفاداری، قوم کی خدمت کا جذبہ اور دیانت داری جیسے اوصاف کے حامل افراد تو کسی حلقے کا امیدواربننے کے قابل نہیں ہیں۔

انہوں نے کہا کہ عوام شعور کی آنکھ کھولیں اور نظام انتخاب کی تبدیلی کیلئے اپنے کردار کو پہچانیں اور ایسی اجتماعیت میں شامل ہوں جو ملک میں حقیقی جمہوریت کیلئے جدوجہد کر رہی ہے۔