الیکشن جمہوریت اور ووٹ کے نام پر ہونے والا سب سے بڑا فراڈ ہے۔ سردار منصور خان

آج کرپٹ نظام کو ووٹ ڈالے جائیں گے اور 12 مئی سے بدترین ہارس ٹریڈنگ کا آغاز ہو جائے گا
عوام آج کے دن کو تاریخ کاحصہ بنادیں اور دھرنوں میں شرکت کر کے کرپٹ نظام انتخاب کو مسترد کر دیں
ایک حلقہ میں 10 سے 15 لاکھ روپے کے انتخابی اخراجات کی پابندی کو ہوا میں اڑا دیا گیا
الیکشن کمیشن آف پاکستان قوم کا مجرم ادارہ ہے

پاکستان عوامی تحریک کے مرکزی ڈپٹی سیکرٹری جنرل سردار منصور خان نے کہاہے کہ آج ہونیوالا الیکشن جمہوریت اور ووٹ کے نام پر ہونے والا سب سے بڑا فراڈہے۔ غیر آئینی، غیرقانونی اور غیر اخلاقی الیکشن کمیشن نے جعلی اسمبلی بنانے کے تمام لوازمات مرحلہ وار مکمل کر لئے ہیں۔ آج کے دن کرپٹ نظام کو ووٹ ڈالے جائیں گے اور 12 مئی سے بدترین ہارس ٹریڈنگ کا آغاز ہو جائے گا۔

وہ گزشتہ روز پاکستان عوامی تحریک اسلام آباد، راولپنڈی کے عہدیداران اور انتظامی کمیٹیوں کے سربراہان کے اجلاس میں گفتگو کر رہے تھے۔ انہوں نے کہا کہ ایک ایک ممبر کروڑوں روپے میں خریدا جائے گا اور سیاسی خرید و فروخت کا وہ تماشا لگے گا کہ پوری قوم کی آنکھیں کھل جائیں گی۔ عوام سے اپیل ہے کہ آج کے دن کو تاریخ کاحصہ بنادیں اور کرپٹ نظام انتخاب کو مسترد کر دیں اور ووٹ ڈالنے کی بجائے پاکستان عوامی تحریک کے دھرنوں میں ہر شہر میں لاکھوں کی تعداد میں شرکت کریں۔ دھرنے ملک میں حقیقی جمہوریت کی بنیاد ثابت ہوں گے۔ سیاسی جماعتوں نے اربوں روپے کی میڈیا کمپین کے ذریعے ایک حلقہ میں 10 سے 15 لاکھ روپے کے انتخابی اخراجات کی پابندی کو ہوا میں اڑا دیا ہے۔ الیکشن کمیشن آف پاکستان قوم کا مجرم ادارہ ہے جس نے کرپٹ انتخابی نظام کو تحفظ دے کر ملک و قوم کے مستقبل کو تباہی کی طرف دھکیل دیا ہے۔ 11 مئی کے الیکشن کے بعد ملک میں دہشت گردی اور معاشی بدحالی میں اضافہ ہو گا۔ مہنگائی کا عفریت عوام کو مزید نگلے گا، عوام بنیادی ضروریات کو ترسیں گے، لوڈ شیڈنگ کی اذیت مزید بڑھے گی۔ تبدیلی کا نعرہ لگانے والے قوم کو مایوس کریں گے کرپٹ نظام انتخاب کے ذریعے 100 الیکشن بھی تبدیلی نہ لا سکیں گے۔