لودہراں: محفل میلاد مصطفی صلی اللہ علیہ وآلہ وسلم

ادب مصطفی صلی اللہ علیہ وآلہ وسلم مسلمان کے ایمان کو پختہ کرتا ہے جس مسلمان کے دل میں ادب مصطفی صلی اللہ علیہ وآلہ وسلم کمزور پڑ جائے اس کا ایمان بھی کمزور پڑ جاتا ہے ان خیالات کا اظہار علامہ غضنفر حسنین قادری مرکزی ناظم دعوت منہاج القرآن نے ملک محمد اسلم چنڑ کی رہائش گاہ پر منعقدہ محفل میلاد سے کیا۔ انہوں نے کہا کہ تحریک منہاج القرآن اللہ اور اس کے حبیب صلی اللہ علیہ وآلہ وسلم سے تعلق کو مضبوط کر رہی ہے جس کا ایک منہ بولتا ثبوت سرزمین پاکستان پر قائم گوشئہ درود ہے جس میں سال کے 365 دن حضور صلی اللہ علیہ وآلہ وسلم پر درود پاک پڑھا جا رہا ہے جو خدا اور مصطفی صلی اللہ علیہ وآلہ وسلم سے مسلمان کے تعلق کو مضبوط کرتا ہے۔ انہوں نے مزید کہا کہ اگر مسلمان اپنے ایمان کی مضبوطی اور سلامتی چاہتے ہیں تو انہیں اپنے دلوں میں ادب مصطفی صلی اللہ علیہ وآلہ وسلم کی شمع کو روشن کرنا ہوگا۔ محفل میلاد میں ضلع لودہراں کے مشہور نعت خوانان حضرات اللہ ڈتہ مہروی، حافظ عبدالقیوم غوری، پروفیسر نعمان مصطفوی اور دیگر نے آقائے دوجہاں صلی اللہ علیہ وآلہ وسلم کی شان میں مداح سرائی کی۔ محفل میلاد میں خصوصی شرکت رہنما تحریک منہاج القرآن خواجہ محمد یعقوب، ضلعی امیر چوہد ری عبد الغفار سنبل، صدر علماء کونسل علامہ نصیر احمد بابر اور ملک یوسف چنڑ نے کی۔ اس کے علاوہ محفل پاک کی تقریب میں تحریک منہاج القرآن کے جملہ کارکنان و عہدیداران اوراہلیان علاقہ نے کثیر تعداد میں شرکت کی۔ آخر میں ملک پاکستان کی امن و سلامتی  کے لئے خصوصی دعا بھی کی گئی۔