عزت مآب الشیخ پروفیسر ڈاکٹر احمد عمر ہاشم (سابق وائس چانسلر جامعہ الأزہر)

تمام تعریفیں اس اﷲ تعالیٰ کے لیے ہیں جو تمام جہانوں کا پروردِ گار ہے اور درود و سلام ہو تمام رسولوں سے معزز رسول ہمارے سردار حضرت محمد مصطفیٰ صلی اللہ علیہ وآلہ وسلم اور آپ صلی اللہ علیہ وآلہ وسلم کی آل اور تمام صحابہ کرام پر۔

میں نے ڈاکٹر محمد طاہرالقادری صاحب کی کتاب ’’المنہاج السوي من الحدیث النبوي صلی اللہ علیہ وآلہ وسلم ‘‘ کا مطالعہ کیا ہے، بے شک یہ ایک عظیم کتاب ہے۔ اس لئے بھی کہ یہ حضور نبی اکرم صلی اللہ علیہ وآلہ وسلم کی صحیح احادیث کے قابلِ ذکر مجموعہ پر مشتمل ہے اور اس لئے بھی کہ یہ مجموعہ حدیث عقیدہ، عبادات اور اخلاقیات کے متعدد ابواب پر مشتمل ہے۔ اس کام میں فاضل مؤلف کی کوشش قابلِ تحسین ہے جس کے ذریعہ انہوں نے اس کائنات کے معزز ترین ورثے کی خدمت میں اپنا حصہ ڈالا ہے۔ اور وہ ورثہ حضور نبی اکرم صلی اللہ علیہ وآلہ وسلم صاحب الحوض اور مقام محمود، سید الخلق اور ہمارے شفیع و سردار حضرت محمد مصطفیٰ صلی اللہ علیہ وآلہ وسلم کی احادیثِ مبارکہ ہیں۔

اس میں کوئی شک نہیں کہ حضور نبی اکرم صلی اللہ علیہ وآلہ وسلم کی احادیث کو پھیلانے میں دین و دنیا کی بھلائی، عقیدہ و عبادت کی بہتری اور اخلاق و شریعت کی بہترین خدمت ہے۔ یہ کتاب ان اہم ترین کتابوں میں سے ایک ہے جو اسلام کے اصل الاصول (جو کہ قرآن کے بعد دوسرا مصدر ہے) یعنی سنتِ نبویہ علی صاحبھا افضل الصلاۃ واتم السلام پر مشتمل ہونے کی وجہ سے خدمتِ اسلام کا بڑا ذریعہ ہیں۔ پس اﷲ تعالیٰ اس کتاب کے مؤلف پروفیسر ڈاکٹر محمد طاہرالقادری چانسلر جامعہ منہاج القرآن کو اس محنت شاقہ پر جو انہوں نے اس کتاب کی تیاری میں صرف کی جزائے خیر عطا فرمائے۔ ان کی خدمتِ سنت کی یہ سعی ہمارے آقا و مولیٰ حضور نبی اکرم صلی اللہ علیہ وآلہ وسلم کی بارگاہ میں شرف قبولیت سے نوازی جائے۔ میں اﷲ تعالیٰ سے عرض گزار ہوں کہ وہ میری، آپ سب کی اور تمام مسلمانوں کی مغفرت فرمائے، اس کتاب کے ہر قاری کو نفع بخشے اور ہمارے آقا و مولی حضور نبی اکرم صلی اللہ علیہ وآلہ وسلم اور آپ صلی اللہ علیہ وآلہ وسلم کی اہل بیت اَطہار سلام اﷲ علیھم اور صحابہ کرام ث پر درود و سلام بھیجے۔