حکومت میں بیٹھی خائن کی باقیات لٹیرے خاندان کا تحفظ کر رہی ہے، ڈاکٹر طاہرالقادری

نواز شریف نے 15 ارب میں جاتی امراء کی جاگیر بیچ دی، ڈاکٹر طاہرالقادری
متفقہ نااہل نواز شریف اور حکومت نے مل کر ریاست کے خلاف اعلان جنگ کر دیا
نواز شہباز ایک ہی سکے کے دو رخ دونوں کا طریقہ واردات جدا جدا ہے۔ ، سربراہ عوامی تحریک
جس عوام کی جیبوں پر ڈاکے ڈالے انہی کے سامنے مگرمچھ کے آنسو بہا رہے ہیں
قاتل اور قومی لٹیرے جلسوں کی بجائے عدالت میں بیگناہی کے ثبوت دیں
سانحہ ماڈل ٹاؤن کا منصوبہ وزیراعظم ہاؤس میں بنا، وزیراعلیٰ پنجاب نے عمل کیا

لاہور (19 نومبر 2017) پاکستان عوامی تحریک کے سربراہ ڈاکٹر محمد طاہرالقادری نے کہا ہے اطلاع ہے کہ نواز شریف نے 15 ارب روپے میں جاتی امراء کی تین ہزار کنال کی جائیداد فروخت کر دی جس کی رقم لندن میں وصول کی جائے گی۔ اقتدار کے سوا پاکستان میں پہلے بھی ان کا کچھ نہیں تھا۔ اب اقتدار بھی چلا گیا جلدجھوٹا، لٹیرا، قاتل اور کرپٹ نواز شریف بھی بھاگ جائے گا۔ اقتدار میں رہتے ہوئے قومی اداروں کو رسواء کرنے کے ایجنڈے کو مکمل کرنے میں ناکام شخص اقتدار سے محرومی پر وہی ایجنڈا مکمل کرنا چاہتا ہے۔ خدا جانے قومی ادارے اس قاتل اور لٹیرے کو کس وجہ سے برداشت کررہے ہیں۔ موجودہ حکومت اس خائن کی پشت پر ہے جب تک یہ حکومت اور پنجاب کا قاتل اعلیٰ برسراقتدار ہے قومی اداروں کے خلاف سازشیں ہوتی رہیں گی آئین، قانون اور قومی اداروں کا تمسخر اڑتا رہے گا نواز شریف اور شہباز شریف دونوں ایک ہی سکے کے دو رخ ہیں ان کا طریقہ واردات جدا جدا ہے۔ وہ عوامی تحریک کے سینئر رہنماؤں سے ٹیلیفون پر گفتگو کررہے تھے۔

انہوں نے کہا کہ نواز شریف نے لوٹ مار سے متعلق کسی سوال کا عدالت میں جواب نہیں دیا۔ ایک متفقہ نااہل شخص کس منہ سے جلسے کررہا ہے؟ ایسے لٹیروں کو تو جیل کی سلاخوں کے پیچھے ہونا چاہئے اشرافیہ کی لوٹ مار کا مرکزی کردار لندن میں چھپا بیٹھا ہوا ہے۔ یہ سچے ہیں تو عدالتوں کا سامنا کریں اور بیگناہی کے ثبوت دیں۔ جس عوام کی جیبوں پر انہوں نے ڈاکے ڈالیں آج انہیں سے ہی خطاب کررہے ہیں اور مگر مچھ کے آنسو بہا رہے ہیں یہ بہت عیار اور مکار ہیں خدا جانے انہوں نے یہ عیاری اور مکاری کہاں سے سیکھی۔ یہ فرعون یا یزید کے دور میں ہوتے تو ان کے مظالم پر وہ بھی شرما جاتے۔ نواز شریف نے موجودہ حکومت سے مل کر ریاست کے خلاف اعلان جنگ کردیا۔

ڈاکٹر طاہرالقادری نے کہا کہ سانحہ ماڈل ٹاؤن کی منصوبہ بندی وزیراعظم ہاؤس میں ہوئی عمل درآمد وزیراعلیٰ ہاؤس پنجاب میں ہوا۔ ساڑھے تین سال گذر جانے کے بعد بھی 14 شہداء کے ورثاء کو انصاف نہیں ملا۔ جسٹس باقر نجفی رپورٹ میں قاتلوں کے نام اور پتے درج ہیں رپورٹ کے پبلک ہونے سے قاتلوں کو نکالے جانے کا جواب بھی مل جائے گا۔

ڈاکٹر طاہرالقادری نے مزید کہا کہ نیب کی طرف سے لٹیروں کے نام ای سی ایل میں ڈالنے کی منظوری کے باوجود حکومت میں بیٹھی خائن کی باقیات لٹیرے خاندان کا تحفظ کررہی ہے۔ انہوں نے کہا کہ نواز شریف قومی ادروں کے خلاف بغاوت کا اعلان کرچکے ہیں۔ دیکھتے ہیں قانون ان کے خلاف حرکت میں کب آتا ہے۔