بے روزگار کو پاؤں پر کھڑا کرنا بہت بڑی انسانی خدمت ہے، ڈاکٹر حسین محی الدین قادری

صدر منہاج القرآن انٹرنیشنل نے طارق سلطان کو رکشے کی چابی دی

لاہور (24 اپریل 2021) تحریک منہاج القرآن کے شعبہ ریسورسز اینڈ ڈویلپمنٹ کی طرف سے طارق سلطان کو حلال روزگار کمانے اور اپنے پاؤں پر کھڑا ہونے کے لیے رکشہ ڈونیٹ کیا گیا جس کی چابی ڈاکٹر حسین محی الدین قادری صدر منہاج القرآن انٹرنیشنل نے اپنے ہاتھوں سے دی۔

اس موقع پر ڈاکٹر حسین محی الدین قادری نے گفتگو کرتے ہوئے کہا کہ فی زمانہ کسی کو رزق حلال کمانے کے لیے پاؤں پر کھڑا کرنا بہت بڑی نیکی اور انسانی ہمدردی ہے۔ بے روزگاری کے متاثرہ خاندان کے ساتھ ساتھ پوری سوسائٹی پر انتہائی منفی اثرات مرتب ہوتے ہیں بعض شائع شدہ رپورٹس کے مطابق اس وقت پاکستان میں سنگین جرائم اور سٹریٹ کرائم میں اضافہ کی ایک بڑی وجہ بے روزگاری ہے۔ بے روزگاری کا عفریت براہ راست لا اینڈ آرڈر اور سوسائٹی کے امن و سکون سے جڑا ہوا ہے۔ اس لئے اللہ تعالیٰ نے جنھیں مالی آسودگی اور خوشحالی کی نعمت سے نوازا ہے وہ اپنی مالی استعداد اور توفیق کے مطابق بے روزگار افراد کو برسرروزگار لانے کے لیے اپنے وسائل بروئے کار لائیں۔ اس موقع پر ڈائریکٹر ریسورسز اینڈ ڈویلپمنٹ محمد شاہد لطیف قادری، نصراللہ خان طارق خان، رانا محمد شکیل جواد حامد ملک شمیم احمد نمبردار موجود تھے۔

شعبہ ریسورسز اینڈ ڈویلپمنٹ کی طرف سے جامع شیخ الاسلام میں نماز جمعہ کی ادائیگی کے لئے آنے والوں اور منہاج القرآن سیکرٹریٹ کے ذمہ داران اور کارکنان میں ماسک بھی تقسیم کئے گئے۔