تحریک منہاج القرآن کے زیراہتمام شب برات و مجلس ختم الصلوۃ علی النبی ﷺ کا روحانی اجتماع

تحریک منہاج القرآن کے زیراہتمام شبِ برات کے مقدس و بابرکت موقع پر ’’محفل شب برات و ماہانہ مجلس ختم الصلٰوۃ علی النبی ﷺ‘‘ جامع شیخ الاسلام ماڈل ٹاؤن لاہور میں منعقد ہوئی، جس میں قائد تحریک شیخ الاسلام ڈاکٹر محمد طاہرالقادری دامت برکاتہم العالیہ نے بذریعہ ویڈیو لنک ’’شب برات اور آداب سوال‘‘ کے موضوع پر خطاب کرتے ہوئے کہا کہ یہ رات اللہ سے التجا کرنے اور سوال کرنے کا ادب سیکھنے کی رات ہے، آقا کریم ﷺ فرماتے ہیں نصف شعبان کی رات اللہ تبارک و تعالیٰ آسمان دنیا پر اپنی شان کے مطابق نزول اِجلال فرماتا ہے اور مانگنے والی کی ہر دعا قبول کرتا ہے۔ یہ رات اللہ سے التجا کرنے اور سوال کرنے کا ادب سیکھنے کی رات ہے، اگر مانگنے کا ادب آ جائے تو سوالی کو اس بارگاہ کے ساتھ جڑنے کا پتہ چلتا ہے۔ رسول اللہ ﷺ کا ارشاد ہے: اللہ تعالیٰ شعبان کی پندرھویں شب (آسمانِ دنیا پر) اپنی شانِ جلالت کا اِظہار فرماتا ہے اور دو اشخاص یعنی چغل خور اور قاتل کے علاوہ سب کی بخشش فرما دیتا ہے۔ ان کا کہنا تھا کہ عبادت میں دھیان اپنی عبادت کی طرف نہ ہو بلکہ ذاتِ اِلٰہی کی معرفت و قربت مقصود ہو۔ شب براءت میں اللہ سے ادب والی بندگی اور ہدایت مانگو۔ ’مَیں‘ کہنے والا عبادت اور عبودیت کے مقام سے دور ہو جاتا ہے۔ دعا میں خود غرضی نہیں ہونی چاہیے، بلکہ تمام اُمتِ مسلمہ کے لیے دعا کی جائے۔ انہوں نے کہا اگر نیت خالص ہو تو عادت، عبادت میں بدل جاتی ہے، لیکن اگر نیت میں صِدق و اِخلاص نہ رہے تو عبادت، عادت میں بدل جاتی ہے۔

روحانی اجتماع سے علامہ محمد شہزاد مجددی، علامہ عین الحق بغدادی و دیگر نے بھی خطاب کیا۔

اس سے قبل پروگرام کا باقاعدہ آغاز تلاوت قرآن پاک سے ہوا جس کی سعادت جامع شیخ الاسلام کے امام قاری اللہ بخش نقشبندی نے حاصل کی، جبکہ حسان منہاج محمد افضل نوشاہی، مرغوب احمد ہمدانی، شکیل احمد طاہر، عبداللہ شیخ (کینیڈا)، ہارون قیوم (ناروے)، فیصل عابد، محمد ابوذر اور ڈاکٹر غلام حسین قادری نے گلہائے عقیدت بحضور سرور کونین ﷺ پیش کیے۔

ناظم اعلیٰ خرم نواز گنڈاپور، نور اللہ صدیقی، مفتی عبدالقیوم خان ہزاروی، جواد حامد، میاں زاہد اسلام، علامہ امداد اللہ قادری، علامہ میر آصف اکبر قادری، صاحبزادہ محمد قاسم، سہیل احمد رضا، غلام مرتضیٰ علوی، سید مشرف حسین شاہ، فضہ حسین قادری، سدرہ کرامت و دیگر قائدین بھی محفل میں شریک ہوئے۔ پروگرام میں مشائخ عظام، علماء کرام، قراء و نعت خواں حضرات سمیت مرد و خواتین کی بڑی تعداد موجود تھی۔

محفل کے اختتام پر گوشۂ درود و سلام میں اب تک پڑھا گیا درود پاک 4,96,12,82,24,281 مرتبہ، آقا کریم علیہ الصلوۃ کی بارگاہ عالیہ میں پیش کیا گیا، جبکہ علامہ امداد اللہ قادری نے گناہوں کی معافی اور ملک و ملت کی سلامتی کے لیے خصوصی دعا کروائی۔