ایم ایس ایم کے تحت گلگت بلتستان کے طلباء کیلئے ونٹر سٹڈی و تربیتی کیمپ کا آغاز

مصطفوی سٹوڈنٹس موومنٹ کے زیراہتمام جاری ایک ماہ دورانیہ کے ونٹر سٹڈی کیمپ میں 50 طلباء شریک ہیں
منہاج القرآن کے سکالرز طلباء کو عصری علوم، کیرئیر کونسلنگ، ادبی و علمی موضوعات پر لیکچر دے رہے ہیں
نوجوان پاکستان کا مستقبل ہیں ان کو انتہاء پسندی سے بچانا ہمارا مشن ہے: شیخ فرحان عزیز

لاہور (9 جنوری 2024) مصطفوی سٹوڈنٹس موومنٹ کے زیراہتمام گلگت بلتستان کے 50 طلباء کیلئے سالانہ ونٹر سٹڈی و تربیتی کیمپ لاہور میں شروع ہو گیا۔ کیمپ میں شریک طلباء کو امتحان کی تیاری کے ساتھ ساتھ طلباء کی کونسلنگ کیلئے خصوصی پروگرامز بھی منعقد کیے جارہے ہیں۔

مصطفوی سٹوڈنٹس موومنٹ کے مرکزی صدر شیخ فرحان عزیزنے گلگت بلتستان سے آئے طلباء سے گفتگو کرتے ہوئے کہا کہ گلگت بلتستان سے آئے محب وطن، امن پسند، علم دوست طلباء کو منہاج القرآن میں خوش آمدید کہتے ہیں۔ یہ عظیم طلباء اس سرد موسم میں علم اور تربیت کیلئے اتنا لمبا سفر کرکے لاہور آئے ہیں۔

شیخ فرحان عزیز نے کہا کہ ملک کا مستقبل اور استحکام طلباء و نوجوانوں کے ساتھ وابستہ ہے۔ گلگت بلتستان میں ترقی کیلئے طلباء اور نوجوانوں کو اعتماد دینا ہوگا۔ نوجوان پاکستان کا مستقبل ہیں ان کو انتہاء پسندی سے بچانا ہمارا مشن ہے۔ ہماری جدوجہد ہے کہ گلگت بلتستان کے نوجوان سائنس و ٹیکنالوجی کے جدید علوم میں مہارت حاصل کریں۔

انہوں نے کہا کہ مصطفوی سٹوڈنٹس موومنٹ کے زیراہتمام ونٹرسٹڈی کیمپ میں گلگت بلتستان کے طلباء کو ان کے امتحان کے تیاری کروائی جاتی ہے اور لاہور جیسے تاریخی شہر کی سیر بھی کروائی جاتی ہے۔

سینئر صحافی، دانشور، ماہرین تعلیم، فرسٹ ایڈ ٹریننگ اورتحریک منہاج القرآن کی نظامت دعوت و تربیت کے سکالرز روزانہ کی بنیاد پر خصوصی لیکچر دے رہے ہیں۔ ایک ماہ دورانیہ کا ونٹر سٹڈی و تربیتی کیمپ 5 فروری تک جاری رہے گا۔

جنرل سیکرٹری مصطفوی سٹوڈنٹس موومنٹ میاں عنصر محمود، محسن اقبال، سہیل مجید، راشد مصطفوی و دیگر رہنمائوں گلگت بلتستان سے آئے طلبہ کو خوش آمدید کہا۔ تحریک منہاج القرآن کی نظامت دعوت و تربیت کے سکالرز علامہ غلام مرتضیٰ علوی، نور العین قادری سمیت دیگر سکالرز ونٹر سٹڈی کیمپ میں موجود طلباء کو فہم القرآن، عصری علوم، کیرئیر کونسلنگ و دیگر ادبی و علمی مشاغل کے ذریعے تربیت دے رہے ہیں۔ فن خطابت پر مصطفوی سٹوڈنٹس موومنٹ کے رہنما مطاہر منصور مصطفوی روزنہ کی بنیاد پر لیکچرز دیں گے۔