منہاج ویلفیئر فاؤنڈیشن، شادیوں کی اجتماعی تقریب، 23 جوڑے رشتہ ازدواج میں منسلک

دوسروں کی مدد کرنے سے ڈیپرشن سے نجات ملتی ہے، ڈاکٹر حسن قادری کا خطاب
تقریب سے ڈی جی پیمرا عائشہ وٹو، خرم نواز گنڈا پور، انجم نثار، ڈاکٹر عابد عزیز کا خطاب
ہر دلہن کو 5 لاکھ روپے کے گھریلو سامان کا تحفہ دیا گیا، باراتیوں کےلیے پرتکلف کھانا
ڈائریکٹر سید امجد علی شاہ نے منہاج ویلفیئر فاؤنڈیشن کے فلاحی منصوبہ جات پر بریفنگ دی
تقریب میں زباب رانا، فہیم الرحمان سہگل، مسعود درانی، شمشاد احمد صدیقی کی شرکت

لاہور (23 فروری 2025) منہاج القرآن انٹرنیشنل کے صدر پروفیسر ڈاکٹر حسین محی الدین قادری نے منہاج ویلفیئر فاؤنڈیشن کے زیر اہتمام منعقدہ مقامی ہوٹل میں23 جوڑوں کی شادیوں کی اجتماعی تقریب میں شرکت کی۔ دولہوں اور دلہنوں کو رشتہ ازدواج میں منسلک ہونے اور مثالی انتظامات پر ڈائریکٹر سید امجد علی شاہ کو مبارکباد دیتے ہوئے کہا کہ مخلوق خدا کی خدمت ہر اعتبار سے قابل رشک اور قابل قدر عمل ہے یہ عمل اللہ کے ہاں بہت محبوب ہے، چیئرٹی کا اجروثواب تو مسلمہ ہے ہی مگر خیرات اور دوسروں کی مدد کے انسانی صحت پر نہایت مثبت طبی اثرات مرتب ہوتے ہیں، یہ سائنسی اعتبار سے ثابت شدہ ہے کہ کمیونٹی سروسز سے ڈیپرشن ختم ہوتا ہے اور بےجا وسوسوں اور خدشات و خوف سے نجات ملتی ہے، دوسروں کی مدد سے خوشی کے جذبات جنم لیتے ہیں، حقیقی خوشی کےلیے خود کو دوسروں کےلیے نفع بخش بنائیں، انھوں نے کہا کہ اسلام کی پہلی ریاست، ریاست مدینہ اخوت و مواخات اور ایثار کے عمل سے قائم ہوئی۔

منہاج ویلفیئر فاؤنڈیشن 21 سال سےشادیوں کی اجتماعی تقاریب منعقد کرکے معاشرے کے سفید پوش اور غریب طبقات کی خوشیوں میں شریک ہو رہی ہے، منہاج ویلفیئر فاؤنڈیشن دکھی انسانیت کی خدمت اور مدد میں پیش پیش ہے، یہاں کفالت بھی ہے اور مدد و معاونت بھی۔

تقریب سے خطاب کرتے ہوئے ناظم اعلیٰ خرم نواز گنڈا پور نے کہا کہ منہاج ویلفیئر فاؤنڈیشن اب تک 3 ہزار سے زائد جوڑوں کی شادیاں کروانے کی سعادت حاصل کر چکی ہے، منہاج ویلفیئر فاؤنڈیشن پینے کا صاف پانی فراہم کرنے کے ساتھ ساتھ، غریب شہریوں کو ان کے عزت نفس کا خیال رکھتے ہوئے بڑے شہروں میں سستا کھانا فراہم کر رہی ہے، جو اپنی نوعیت کا ایک منفرد فلاحی پراجیکٹ ہے، انھوں نے کہا کہ سوسائٹی کے مخیر حضرات دکھی انسانیت کی خدمت اور مدد میں بڑھ چڑھ کر حصہ لیں۔

تقریب کے میزبان ڈائریکٹر سید امجد علی شاہ نے اظہار خیال کرتے ہوئے کہا کہ شیخ الاسلام ڈاکٹر محمد طاہر القادری کا ویثرن ہے کہ مستحقین کی مدد اس انداز سے کریں کہ وہ نہ صرف خود پاؤں پر کھڑا ہو بلکہ دوسروں کی مدد کرنے والا بن جائے، ہمارا عزم ہے کہ زکوٰۃ لینے والے زکواۃ دینے والے بن جائیں۔ مفت تعلیم حاصل کرنے والے دوسروں کو تعلیم دینے والے بن جائیں۔

انھوں نے کہا کہ منہاج ویلفیئر فاؤنڈیشن کے تحت کام کرنے والا سٹیٹ آف دی آرٹ ادارہ "آغوش آرفن کیئر ہوم" یتیم بچوں کی تعلیم و تربیت کر رہا ہے جہاں سے ہزار ہا بچے اعلیٰ تعلیم حاصل کرکے عملی زندگی میں ملک و قوم کی خدمت کر رہے ہیں۔

تقریب میں ہالینڈ سے خصوصی طور پر شرکت کےلیے آئے ہوئے ڈونر اور مہمان خصوصی ڈاکٹر عابد عزیز نے اظہار خیال کرتے ہوئے کہا کہ وہ لوگ خوش قسمت ہیں جو انسانیت سے محبت کرکے دعائیں لیتے اور دعائیں دیتے ہیں، انھوں نے کہا کہ شیخ الاسلام ڈاکٹر محمد طاہر القادری اور ان کا ادارہ منہاج القرآن فی زمانہ اللہ کی نعمت ہے، یہ ادارہ دکھی انسانیت کی مدد کی ہرممکن کوشش کر رہا ہے۔ انھوں نے کہا کہ مجھے خوشی ہے کہ آج کی اجتماعی شادیوں میں شریک جوڑے تمام ضروریات زندگی کے سامان کے ساتھ اپنے گھروں میں جائیں گے دوسروں کی مدد کرنا اللہ کو بے حد پسند ہے۔

ڈی جی پیمرا عائشہ منظور وٹو نے تقریب میں اظہار خیال کرتے ہوئے کہا کہ دنیا کا سکون اللہ کے ذکر اور مخلوق خدا کی مدد میں ہے، رشتہ ازدواج دنیا میں اللہ کا سب سے محبوب رشتہ ہے، اس رشتے کو جوڑنے میں مدد کرنے والے اللہ کی رحمتوں کے مستحق ٹھہرتے ہیں اس دور میں مستحقین کےلیے شادی جیسے مستحسن عمل میں مالی مدد فراہم کرنا اور ان کی خوشیوں میں شریک ہونا بہت بڑی نیکی ہے۔ منہاج ویلفیئر فاؤنڈیشن اور شیخ الاسلام ڈاکٹر محمد طاہر القادری کو انسانی خدمت کا خوب صورت ادارہ قائم کرنے پر مبارک باد دیتی ہوں، انھوں نے کہا کہ اس موقع پر میں والدین اور مخیر حضرات سے کہوں گی کہ اس بات کا اہتمام کریں کہ ہر جوڑا شادی سے پہلے کوئی ہنر ضرور سیکھے۔

پیٹرن چیف پیاف میاںانجم نثار نے اظہار خیال کرتے ہوئے کہا کہ 23 جوڑے اپنی زندگی کے نئے سفر کا آغاز کر رہے ہیں میں انھیں مبارک باد دیتا ہوں، منہاج القرآن ملک بھر میں انسانی خدمت کے ادارے قائم کر رہا ہے میں اس پر شیخ الاسلام ڈاکٹر طاہر القادری کو مبارک دیتا ہوں، اور توفیقات میں اضافہ کےلیے دعا گو ہوں۔

محترمہ فضہ حسین قادری، ڈی جی پیمرا عائشہ منظور وٹو، سینئر اداکارہ زباب رانا، شہزادی گلفام نے دلہنوں میں حق مہر کی رقم تقسیم کی۔ مسیحی جوڑا بھی شادیوں کی تقریب میں شریک تھا جن کی رسم نکاح مسیحی عقیدہ کے مطابق انجام دی گئی۔ تقریب میں چیئرمین پیاف فہیم الرحمان سہگل، مسعود درانی، شمشاد احمد صدیقی، عاصم رفیق، حاجی خالد، شہزاد اسلم سمیت دیگر شخصیات نے شرکت کی۔

Dua