سحر و افطار کے لاتعداد طبی و روحانی فوائد ہیں: ڈاکٹر حسین محی الدین قادری

رمضان المبارک اسلام کی اجتماعی تہذیب و ثقافت کا شاندارمظہر ہے
روزہ دار اللہ کی رضا کےلئے خندہ پیشانی کے ساتھ بھوک کی تکلیف برداشت کرتے ہیں
سحر و افطار کی مبارک گھڑیوں میں کی گئی ہر دعا قبول ہوتی ہے: صدر منہاج القرآن

لاہور (5 مارچ 2025) صدر منہاج القرآن انٹرنیشنل پروفیسر ڈاکٹر حسین محی الدین قادری نے کہا ہے کہ سحر و افطار کے لاتعداد روحانی و طبی فوائد ہیں۔ ان مبارک گھڑیوں میں کی گئی ہر دعا اللہ قبول کرتا ہے۔ سحر و افطار کا اہتمام اور پھر عزیز و اقارب، ہمسایوں، مستحقین کو اپنے دستر خوان کا حصہ بنانا بہترین عبادت ہے۔ یہ اعمال اللہ اور اس کے رسول ؐ کو بے حد عزیز ہیں۔

انہوں نےکہا کہ اس مبارک مہینے کے ہر لمحے کو اصلاح احوال اور تزکیہ نفس کے لئے بروئے کار لایا جائے۔ رمضان المبارک کے بابرکت مہینے کا ہر لمحہ رحمتوں اور مغفرتوں سے لبریز ہے۔ انہوں نے کہاکہ رمضان المبارک اسلام کی اجتماعی تہذیب و ثقافت کا شاندار مظہر ہے۔ روزہ کی وجہ سے پوری دنیا کے مسلمان ایک جیسی کیفیات سے دوچار ہوتے ہیں۔ ہر روزہ داراللہ کی رضا کےلئے بھوک کی تکلیف کو خندہ پیشانی کے ساتھ برداشت کرتا ہے۔ روزہ کی حالت میںامیر اور غریب کا فرق ختم ہو جاتا ہے اور پھر ایک ہی وقت میں سحر و افطار کا اہتمام اسلام کے اخوت و بھائی چارہ اور اجتماعیت کے تصور کو عملی جامہ پہناتا ہے۔

پروفیسر ڈاکٹر حسین محی الدین قادری نے کہاکہ حضور نبی اکرم ﷺ نے سحری کے اہتمام کو بہت مبارک اور فضیلت والا عمل قرار دیا ہے۔ رات کے اس آخری پہر میں اللہ کی رضا کے لئے بیدار ہونا اور پھر سحری کا اہتمام کرنا عبادت میں شامل ہے۔ آپ ﷺ نے فرمایا سحری ضرور کھایا کریں اس میں برکتیں ہیں چاہے ایک کھجور یا ایک گھونٹ پانی ہی دستیاب کیوں نہ ہو۔

انہوں نے کہاکہ اللہ رب العزت ہر مسلمان کو رمضان المبارک کے روزے رکھنے اور سحر و افطار کے انوار و برکات سمیٹنے کی توفیق عطا فرمائے۔