دوسروں کو بدلنے کی بجائے خود کو بدلیں: شیخ الاسلام ڈاکٹر محمد طاہرالقادری

ذرائع ابلاغ کو نوجوانوں کے اخلاق و کردار برباد کرنے کے لئے استعمال کیا جارہا ہے
شیخ الاسلام ستائیسویں شب کے عالمی روحانی اجتماع سے خصوصی خطاب کریں گے

لاہور(26 مارچ 2025ء) تحریک منہاج القرآن کے بانی و سرپرست اعلیٰ شیخ الاسلام ڈاکٹر محمد طاہر القادری نے شہر اعتکاف میں چوتھی علمی، روحانی و تربیتی نشست سے خطاب کرتے ہوئے کہا کہ دوسروں کو بدلنے کی بجائے خود کو بدلیں۔ ذرائع ابلاغ کو نوجوانوں کے اخلاق و کردار برباد کرنے کے لئے استعمال کیا جارہا ہے، علمائے کرام، واعظین فروعی اختلافات کی بجائے اتحادِ اُمت پر زور دیں۔ شیخ الاسلام ڈاکٹر محمد طاہرالقادری ستائیسویں شب کے عالمی روحانی اجتماع سے خصوصی خطاب بھی کریں گے۔

شیخ الاسلام نے کہا کہ ہم جس دور سے گزر رہے ہیں وہ فتنوں کا دور ہے۔ ٹیلی ویژن اسکرین کھولو تو فسق و فجور کا طوفان نظر آتا ہے، سیل فون اٹھاؤ تو فحاشی اور بے حیائی کی یلغار دکھائی دیتی ہے، سکولوں اور کالجوں کا رخ کرو تو تعلیم کے ساتھ ساتھ دوستوں کے بیچ فسق و فجور کے قصے سننے کو ملتے ہیں۔ معاشرتی اقدار دم توڑ رہی ہیں، حلال و حرام کی تمیز مٹ چکی ہے، ہر طرف حرص و ہوس، حرام کاری اور حرام خوری کا بازار گرم ہے۔ حسد، بغض اور ایک دوسرے پر تہمت، الزام تراشی جیسے شیطانی رویے عام ہو چکے ہیں۔ یوں محسوس ہوتا ہے کہ ہمارے معاشرے پر جہنم کا سایہ پڑ چکا ہے اور ہم اسی آگ میں جل رہے ہیں۔ ایسے میں ضروری ہے کہ اس جہنم میں ایک جنت بسائی جائے، جہاں نوجوان نسلوں کے اخلاق کو سنوارا جائے، اللہ کے وجود سے انکاری فتنوں کو کچلا جائے اور اللہ کے ساتھ ٹوٹے ہوئے رشتے کو جوڑ کر رسول اللہ ؐ کی محبت میں اپنی زندگیوں کو ڈھالا جائے۔

انہوں نے کہا کہ بدی کے اس دور میں نیکی کا درس دینا، کفر کے اندھیروں میں توحید کا چراغ جلانا اور نفس کی بغاوت کے مقابلے میں اللہ کے عشق کو پروان چڑھانا درحقیقت یہی سب سے بڑا جہاد ہے، جو لوگ اس نیکی کی دعوت کے سفر میں شریک ہوتے ہیں وہ مبارکباد کے مستحق ہیں کیونکہ وہ روشنی کے چراغ تھامے اندھیروں کا مقابلہ کر رہے ہیں۔ اللہ تعالیٰ نے اولاد، ماں باپ، بیوی، گھر اور مال و دولت کی محبت سے منع نہیں کیا، مگر ان سب محبتوں میں ایک حد مقرر کی ہے۔ ان سب کے اوپر اللہ کی محبت کو فوقیت دینا لازم ہے، کیونکہ جب اللہ کی محبت پر باقی محبتیں غالب آ جائیں تو نظامِ زندگی درہم برہم ہو جاتا ہے اور ایسے میں اللہ کی نافرمانی پر اس کا عذاب نازل ہوتا ہے جس کے بعد کوئی چیز سلامت نہیں رہتی، لوگ غلاموں سے بھی بدتر ہو جاتے ہیں۔

انہوں نے کہا کہ اگرچہ ہم پورے معاشرے کے حالات نہیں بدل سکتے، لیکن خود کو بدلنے کی کوشش ضرور کر سکتے ہیں۔ انسان کے اندر بھی ایک دنیا بستی ہے، جس میں انقلاب لانا مکمل طور پر اس کے اپنے اختیار میں ہے۔ جب انسان اپنی خواہشوں، اپنے دل اور اپنے نفس کے اندر تبدیلی پیدا کرتا ہے تو وہ حقیقی انقلاب کا سفر طے کرتا ہے۔ باہر کی دنیا میں انقلاب برپا کرنے سے پہلے اپنی ذات میں تبدیلی لانا ضروری ہے اور اس انقلاب کی بنیاد عشقِ الٰہی ہے، جو انسان کو خود شناسی سے خدا شناسی کی منزل تک پہنچا دیتا ہے۔