قرآن و سنت میں خدمت خلق ایک عظیم عمل ہے: انجینئر ثناء اللہ خان

منہاج ویلفیئر فاؤنڈیشن فلاحی کاموں میں ہمیشہ پیش پیش رہتی ہے، ڈائریکٹر آپریشنز ایم ڈبلیو ایف
اپنا وقت، مال اور صلاحیتوں کو مخلوق خدا کی بھلائی میں استعمال کریں: کیپٹن (ر) عبدالمجید
منہاج القرآن لاہور کے زیراہتمام ”خدمت خلق کی اہمیت“ کے موضوع پر منعقدہ فکری نشست سے خطاب

لاہور (5 اپریل 2025ء) تحریک منہاج القرآن لاہور (منہاج ویلفیئر فاؤنڈیشن)کے زیراہتمام ”خدمت خلق کی اہمیت“ کے موضوع پر ایک فکری نشست کا اہتمام کیا گیا جس سے خطاب کرتے ہوئے ڈائریکٹر آپریشنز منہاج ویلفیئر فاؤنڈیشن انجینئر ثناء اللہ خان نے کہا کہ اسلام ایک ایسا دین ہے جو عبادات کے ساتھ ساتھ انسانیت کی خدمت پر بھی زور دیتا ہے۔ قرآن و سنت میں خدمت خلق کو ایک عظیم عمل قرار دیا گیا ہے۔ خدمت خلق کا مطلب ہے مخلوق خدا کی بھلائی، مدد اور آسانی پیدا کرنا چاہے وہ انسان کسی بھی رنگ و نسل، مذہب یا قوم سے ہو، منہاج ویلفیئر فاؤنڈیشن کے تمام عہدیداران اور رضا کار مبارکباد کے مستحق ہیں کہ وہ شب و روز دکھی انسانیت کی خدمت میں مصروف عمل ہیں۔

انجینئر ثناء اللہ خان نے مزید کہا کہ تحریک منہاج القرآن اور منہاج ویلفیئر فاؤنڈیشن فلاحی کاموں میں ہمیشہ پیش پیش رہتی ہے۔ تعلیم، صحت، امدادی سرگرمیوں اور یتیم بچوں کی کفالت کے شعبوں میں پورے ملک میں خدمات جاری ہیں۔ منہاج ویلفیئر فاؤنڈیشن نے ملک بھر میں فری میڈیکل کیمپس، صاف پانی کے منصوبے اور قدرتی آفات کے دوران ریلیف سرگرمیوں کے ذریعے عوام کی خدمت کی ہے جو متاثرہ علاقوں میں اب بھی جاری ہے۔

منہاج ویلفیئر فاؤنڈیشن کے تحت چلنے والا یتیم اور بے سہارا بچوں کا ادارہ آغوش آرفن کیئر ہوم بچوں کو مکمل سہولیات فراہم کرتا ہے جو یقینا ایک مثالی منصوبہ ہے۔ کوآرڈینیٹر منہاج ویلفیئر فاؤنڈیشن لاہور کیپٹن(ر) عبدالمجید نے فکری نشست میں آئے مہمانوں کا شکریہ ادا کرتے ہوئے منہاج ویلفیئر فاؤنڈیشن کے موبائل ہسپتال کے حوالے سے بریفنگ دی۔

انہوں نے کہا کہ خدمت خلق ایک عظیم عبادت ہے جو اللہ کی رضا، بندوں کی محبت اور آخرت کی نجات کا ذریعہ بنتی ہے۔ ہمیں چاہیے کہ اپنے وقت، مال اور صلاحیتوں کو مخلوق خدا کی بھلائی میں استعمال کریں تاکہ ایک بہتر اور پرامن معاشرہ قائم ہو سکے۔ فکری نشست میں امجد چودھری، ثاقب بھٹی، ممتاز کھچی، حاجی احمد صادق، حاجی خالد، طارق الطاف، رانا بشیر سمیت دیگر راہ نماؤں نے شرکت کی۔