شیخ الاسلام ڈاکٹر محمد طاہرالقادری کے والد گرامی کے 52ویں عرس کی تقریب
ملک بھر سے عالمی شہرت یافتہ قراء و نعت خوانوں نے گلہائے عقیدت پیش کئے
ڈاکٹر فرید الدین قادریؒ ایک متبحر عالم دین تھے، صاحبزادہ ظہیر احمد نقشبندی، صبغت اللہ قادری
لاہور (16 اپریل 2025ء) تحریک منہاج القرآن کے بانی و سرپرست اعلیٰ شیخ الاسلام پروفیسر ڈاکٹر محمد طاہرالقادری کے والد گرامی تحریک پاکستان کے فعال و عظیم راہ نما ڈاکٹر فرید الدین قادریؒ کا 52واں عرس منعقد ہوا جس میں وطن عزیز کے بین الاقوامی شہرت یافتہ قراء حضرات اور نعت خوانوں نے گلہائے عقیدت پیش کئے۔ علامہ صاحبزادہ ظہیر احمد نقشبندی نے خطاب کرتے ہوئے کہا کہ ڈاکٹر فرید الدین قادریؒ ایک عظیم باپ ہی نہیں اپنے وقت کی ایک معتبر اور متبحر علمی شخصیت تھے۔ انہوں نے شیخ الاسلام ڈاکٹر طاہرالقادری کی ابتدائی تعلیم و تربیت بہ نفس نفیس کی اور شیخ الاسلام کی دینی تعلیم و تربیت کے لئے انہیں مدینۃ المنورہ کے قرآن و سنت کے جلیل القدر اساتذہ سے زانوئے تلمذ طے کروایا۔ انہوں نے کہا کہ ڈاکٹر فرید الدین قادریؒ پیشہ کے اعتبار سے ڈاکٹر اور علاقہ کی معروف سماجی و روحانی شخصیت بھی تھے۔
ادارہ منہاج القرآن نے فرید ملت ریسرچ انسٹی ٹیوٹ کا نام انہی کے نام پر رکھا ہے جہاں سے سالانہ درجنوں کتب مختلف زبانوں میں شائع ہوتی اور دنیا بھر کے دینی و علمی حلقوں سے پذیرائی حاصل کرتی ہیں۔ انہوں نے کہا کہ شیخ الاسلام ڈاکٹر محمد طاہرالقادری اگر آج دنیا بھر میں علم و حکمت کے موتی بکھیر رہے ہیں تو اس کے پس پردہ ان کے والد گرامی ڈاکٹر فرید الدین قادریؒ کی تربیت ہے۔
ایڈمنسٹریٹر دربار فرید ملتؒ محمد صبغت اللہ قادری نے اظہار خیال کرتے ہوئے کہا کہ منہاج القرآن علم و تربیت کے فروغ کی تحریک ہے، ہم خوش قسمت ہیں کہ ہمیں فرید ملت حضرت ڈاکٹر فرید الدین قادریؒ کی سرپرستی اور تربیت حاصل ہوئی، انہوں نے پھر ڈاکٹر طاہرالقادری کی تربیت کی جو شیخ الاسلام بن کر پوری دنیا میں علم کا نور پھیلارہے ہیں۔
ڈائریکٹر دارالعلوم فریدیہ قادریہ جھنگ علامہ حافظ عبدالقدیر قادری نے اظہار خیال کرتے ہوئے کہا کہ فرید ملتؒ کا فیض آج بھی جاری ہے۔ ادارہ منہاج القرآن کی سرپرستی میں قائم دارالعلوم سے سینکڑوں طلبا و طالبات قرآن مجید حفظ کرتے اور دین کے علم سے بہرہ مند ہوتے ہیں۔
عرس کی تقریب میں جھنگ کی معروف علمی، روحانی، سیاسی و سماجی شخصیات نے شرکت کی۔ تحریک منہاج القرآن کے مرکزی قائدین علامہ رانا محمد ادریس، انجینئر محمد رفیق نجم، جواد حامد، شہزاد رسول، حافظ عابد بشیر، ڈاکٹر میر آصف اکبر، رانا نفیس حسین قادری، پروفیسر ذوالفقار علی، بریگیڈیئر(ر) عمر حیات، نوراللہ صدیقی، عبدالرحمن ملک، شیخ آفتاب، غلام فرید عاجز، امتیاز اعوان نے فرید ملتؒ کے مزار پر حاضری دی، پھولوں کی چادر چڑھائی۔
تبصرہ