ٹینس سٹار اعصام الحق کا منہاج القرآن کے ادارہ آغوش آرفن کیئر ہوم کا دورہ
اعصام الحق نےآغوش کے بچوں کو صحت مند طرز زندگی اورتعلیم کی اہمیت کے بارے میں بتایا
اعصام الحق نے منہاج یونیورسٹی میں پروفیسر ڈاکٹر حسین محی الدین قادری سے ملاقات بھی کی
آغوش جیسے فلاحی ادارے ہماری معاشرتی ذمہ داریوں کی بہترین عکاسی کرتے ہیں۔اعصام الحق
انٹرنیشنل ٹینس سٹار اعصام الحق قریشی نے تحریک منہاج القرآن کے ذیلی ادارےآغوش آرفن کیئر ہوم اور منہاج یونیورسٹی لاہور کا دورہ کیا۔ اعصام الحق نے منہاج یونیورسٹی کے بورڈ آف گورنرز کے ڈپٹی چیئرمین پروفیسر ڈاکٹر حسین محی الدین قادری سے ملاقات کی۔
پروفیسر ڈاکٹر حسین محی الدین قادری نے اعصام الحق کواپنی تصانیف کا تحفہ پیش کیا۔ اس موقع پر معروف کاروباری شخصیت ڈاکٹر منور بھی موجود تھے۔ اعصام الحق نےآغوش بچوں کے ساتھ وقت گزارا۔ آغوش آرفن کئیر ہوم آمد پر ڈائریکٹر آغوش کمپلیکس کرنل (ر) مبشر اقبال، شہزاد رسول، حاجی محمد اسحاق، عبد الحفیظ چوہدری، طیب ضیاء اور آغوش کے بچوں نےاعصام الحق کا پرجوش استقبال کیا اور آغوش آرفن کئیر ہوم کے حوالے سے تفصیلی بریفنگ بھی دی۔
کرنل (ر) مبشر اقبال نے اعصام الحق کو پھول پیش کئے۔ آغوش کے بچوں نے اس موقع پر چھوٹا سا خیر مقدمی پروگرام بھی پیش کیا۔ اعصام الحق نے بچوں کے ساتھ مختلف کھیلوں میں حصہ لیا، انہیں صحت مند طرز زندگی اور تعلیم و کھیلوں کی اہمیت کے بارے میں بتایا۔ اعصام الحق نے اس موقع پر آغوش میں موجود سہولیات کا تفصیلی جائزہ لیا اور ادارے کی خدمات کو بے حد سراہتے ہوئے کہاکہ آغوش آرفن کیئر ہوم ان تمام بچوں کے لئے ایک بہترین پناہ گاہ ہے جنہیں زندگی نے مشکلات میں ڈال دیا ہے۔ ایسے عظیم ادارے ہماری معاشرتی ذمہ داریوں کی بہترین عکاسی کرتے ہیں۔
اعصام الحق نے آغوش کے قیام پر شیخ الاسلام ڈاکٹر محمد طاہرالقادری کو خراج تحسین پیش کرتے ہوئے کہا کہ ڈاکٹر طاہرالقادری نے اس ادارے کے ذریعے یتیم بچوں کو وہ سہارا دیا ہے جس کی انہیں سب سے زیادہ ضرورت ہوتی ہے۔ انہوں نے کہا کہ آغوش آرفن کیئر ہوم اور عملے کی کاوشیں بے حد قابل ستائش ہیں جو ان بچوں کو ایک روشن مستقبل دینے کے لئے دن رات محنت کر رہے ہیں۔ یہ ادارہ ان تمام بچوں کےلئے امید کی کرن ہے جو دنیا کی سختیوں کا شکار ہوئے ہیں۔ انہوں نے کہا کہ یہ بچے ہمارا مستقبل ہیں۔ ان کے چہروں پر خوشی دیکھ کر مجھے بے حد خوشی ہوئی ہے ہم سب کو چاہئے کہ ان بچوں کےلئے اپنے حصے کا کردار ادا کریں۔ دورے کے دوران اعصام الحق نے آغوش کے مختلف شعبہ جات کا معائنہ کیا، جن میں تعلیمی سیکشن، رہائشی کمروں اور کھانے کے انتظامات شامل تھے۔
انہوں نے کہا کہ یہاں بچوں کے لیے فراہم کی جانے والی سہولیات بین الاقوامی معیار کی ہیں۔ اس موقع پر کرنل(ر) مبشر اقبال نے کہا کہ آغوش میں بچوں کی شخصیت سازی اور انہیں معاشرے کا مفید شہری بنانے کےلئے مختلف سرگرمیاں اور تربیت فراہم کی جاتی ہے تاکہ وہ بہتر مستقبل حاصل کر سکیں۔ ہمارا مقصد بچوں کو ایسا ماحول دینا ہے جہاں وہ محبت، تحفظ اور اعتماد کے ساتھ پروان چڑھ سکیں۔
تبصرہ