اسلام اور پاکستان کی قوت اتحاد و یکجہتی میں ہے: مولانا عبدالحق ثانی
جمعیت علمائے اسلام (س) کے مرکزی راہ نماؤں کا منہاج القرآن سیکرٹریٹ کا دورہ
منہاج القرآن کی طرف سے گوشہ درود میں مولانا حامد الحق شہید کیلئے تعزیتی ریفرنس انعقاد
جامعہ حقانیہ کے علماء کے وفد نے اتحاد اُمت کیلئے شیخ الاسلام ڈاکٹر محمد طاہرالقادری کی خدمات کو سراہا
وفد نے منہاج یونیورسٹی لاہور، نظام المدارس پاکستان، فرید ملت ریسرچ انسٹی ٹیوٹ کا دورہ کیا
وفد کو ڈاکٹر حسین محی الدین قادری، خرم نواز گنڈاپور اور منہاج القرآن کے مرکزی راہنماؤں نے خوش آمدید کہا
وفد کی طرف سے منہاج یونیورسٹی لاہور میں قائم تصوف سنٹر اور پاکستان کی پہلی روبوٹک لائبریری کی تعریف
لاہور (28 اپریل 2025ء) امیر جمعیت علمائے اسلام (س) مولانا عبدالحق ثانی اور جامعہ حقانیہ اکوڑہ خٹک کے مرکزی راہ نماؤں و علماء کے وفد نے منہاج القرآن انٹرنیشنل کے مرکزی سیکرٹریٹ اور منہاج یونیورسٹی لاہور کا دورہ کیا ہے۔ وفد میں مولانا اسامہ سمیع الحق، مولانا محمد احمد، مولانا اعظم حسین، مولانا رحمت اللہ لاشاری، مولانا تنویر، مفتی اویس اور مولانا مامون الرحمن حقانی شامل تھے۔ مرکزی سیکرٹریٹ آمد پر ناظم اعلیٰ خرم نواز گنڈاپور، نائب ناظمین اعلیٰ انجینئر محمد رفیق نجم، نائب ناظم اعلیٰ کے پی کے چودھری عرفان یوسف، بریگیڈیئر(ر) عمر حیات، مفتی غلام اصغر صدیقی، علامہ اشتیاق چشتی، نوراللہ صدیقی و دیگر قائدین نے اُنہیں خوش آمدید کہا۔
مرکزی سیکرٹریٹ گوشہئ درود میں منہاج القرآن انٹرنیشنل کی طرف سے مولانا حامد الحق حقانی شہید کی یاد میں تعزیتی ریفرنس منعقد کیا گیا اوراُن کے درجات کی بلندی کے لئے دعا کی گئی۔
وفد کو نظام المدارس پاکستان کے ناظم امتحانات علامہ عین الحق بغدادی نے اصلاح شدہ نصاب اور جدید امتحانی نظام پر بریفنگ دی اور کہا کہ فول پروف امتحانی نظام اور اساتذہ کی تربیتی ورکشاپس اور ٹریننگ کی وجہ سے نظام المدارس پاکستان مدارس دینیہ میں ایک اہم مقام حاصل کر چکا ہے۔
وفد نے اس دورہ کے دوران فرید ملت ریسرچ انسٹی ٹیوٹ، کالج آف شریعہ اینڈ اسلامک سائنسز، منہاج ای لرننگ، منہاج ٹی وی، پروڈکشن ڈیپارٹمنٹ، مرکزی میڈیا سیل کا دورہ کیا اور تحریک منہاج القرآن کے بانی و سرپرست اعلیٰ شیخ الاسلام ڈاکٹر محمد طاہرالقادری کے حسن انتظام اور چیئرمین سپریم کونسل ڈاکٹر حسن محی الدین قادری، صدر منہاج القرآن انٹرنیشنل پروفیسر ڈاکٹر حسین محی الدین و دیگر منتظمین کے مثالی انتظامات کو سراہا۔
علمائے جامعہ حقانیہ اور منہاج القرآن انٹرنیشنل کے علماء، عہدیداروں و کارکنان نے نمازِ ظہر جامع شیخ الاسلام میں ادا کی۔ بعدازاں جامعہ حقانیہ اکوڑہ خٹک کے علماء کے وفد نے منہاج یونیورسٹی لاہور میں تصوف سنٹر، پاکستان کی پہلی روبوٹک لائبریری اور جدید ترین ایڈمیشن بلاک کا بھی دورہ کیا اور اس بات پر خوشی کااظہار کیا کہ منہاج یونیورسٹی لاہور قدیم و جدید علوم کو فروغ دے رہی ہے۔
پروفیسر ڈاکٹر حسین محی الدین قادری نے وفد کو منہاج یونیورسٹی لاہور کے اہم ڈیپارٹمنٹس کے متعلق بریفنگ دی اور بتایا کہ منہاج یونیورسٹی کو یہ اعزاز حاصل ہے کہ وہ پاکستان میں بسنے والے 2کروڑ سے زائد نان مسلم شہریوں کو اُن کے مذہب کے مطابق ڈگری پروگرامز آفر کررہی ہے۔ اس کے علاوہ سکول آف پیس منہاج یونیورسٹی لاہور کی امتیازی شناخت ہے۔
انہوں نے بتایا بین المذاہب رواداری کے فروغ اور اسلامی اقتصادیات کے حوالے سے منہاج یونیورسٹی لاہور کو سب سے زیادہ بین الاقوامی کانفرنسز کی میزبانی کا اعزاز حاصل ہے۔
پروفیسر ڈاکٹر حسین محی الدین قادری نے مولانا عبدالحق ثانی سے مولانا حامد الحق حقانی شہید کے حوالے سے تعزیت کی اور اُن کے درجات کی بلندی کے لئے دعا کی۔ منہاج یونیورسٹی آمد پر وائس چانسلر ڈاکٹر ساجد محمود شہزاد، رجسٹرار ڈاکٹر خرم شہزاد، ڈائریکٹر ایڈمن میجر(ر) سلمان، طیب اسلم نے وفد کو خوش آمدید کہا۔
اس موقع پر مولانا عبدالحق ثانی نے اظہار خیال کرتے ہوئے کہا کہ ادارہ منہاج القرآن اور منہاج یونیورسٹی لاہور کی دینی و تعلیمی خدمات اور طریقہ تدریس جان کر بے حد خوشی ہوئی ہے۔ منہاج یونیورسٹی نوجوانوں کو دینی و علمی میدانوں میں عصری تقاضوں کے مطابق تعلیم اور تربیت مہیا کررہی ہے جو حوصلہ افزاء ہے۔ انہوں نے کہا کہ میں شیخ الاسلام ڈاکٹر محمد طاہرالقادری کے علم و امن کے فروغ اور اتحاد اُمت کے لئے انجام دی جانے والی گراں قدر خدمات کا معترف ہوں۔
انہوں نے اس اُمید کا اظہار کیا کہ یہ دونوں علمی ادارے خیر پر جمع ہیں اور خیر پر ہی آگے بڑھتے رہیں گے اور نفرتوں، کدورتوں کے خاتمے کے لئے اپنا عملی علمی و تحقیقی کردار ادا کرتے رہیں گے۔ اسلام اور پاکستان کی قوت اتحاد و یکجہتی میں ہے۔
تبصرہ