امیر جمعیت علمائے اسلام (س) مولانا عبدالحق ثانی اور جامعہ حقانیہ اکوڑہ خٹک کے وفد کا منہاج یونیورسٹی لاہور کا دورہ
جامعہ حقانیہ اکوڑہ خٹک کے سکالرز کے وفد نے امیر جمعیت علماء اسلام (س) مولانا عبد الحق ثانی کی قیادت میں ڈپٹی چیئرمین بورڈ آف گورنرز منہاج یونیورسٹی لاہور، پروفیسر ڈاکٹر حسین محی الدین قادری سے ملاقات کی۔ اس وفد میں مولانا حافظ لقمان الحق حقانی، مولانا اسامہ سمیع، مولانا محمد احمد، مولانا اعظم حسین، مولانا رحمت اللہ لاشاری، مولانا تنویر صاحب اور مفتی اویس صاحب شامل تھے۔
پروفیسر ڈاکٹر حسین محی الدین قادری نے معزز مہمانوں کو خوش آمدید کہا اور انہیں تصوف سنٹر (شیخ الاسلام انسٹی ٹیوٹ آف اسپیریچوئل اسٹڈیز) سمیت منہاج یونیورسٹی کے مختلف شعبہ جات کا تفصیلی دورہ کروایا۔ وفد نے تعلیمی ماحول اور جدید سہولیات کا مشاہدہ کیا۔
اس موقع پر مولانا عبد الحق ثانی نے منہاج یونیورسٹی لاہور کے تعلیمی نظام کی تعریف کرتے ہوئے کہا کہ منہاج یونیورسٹی کی علمی خدمات اور تعلیمی معیار نہ صرف قابلِ تحسین ہیں بلکہ یہ ادارہ دینی اور دنیاوی تعلیم میں بہترین توازن قائم کرتے ہوئے اسلامی تعلیمات کے فروغ کا فریضہ بھی بخوبی انجام دے رہا ہے۔ انہوں نے کہا کہ یہ یونیورسٹی طلباء کو نہ صرف علمی میدان میں کامیابی عطا کرتی ہے بلکہ انہیں روحانی و اخلاقی ترقی کی راہ پر بھی گامزن کرتی ہے۔
ڈاکٹر حسین محی الدین قادری نے گفتگو کرتے ہوئے فرمایا کہ اسلام کا مستقبل علم و تحقیق اور علمی مکالمے کے ساتھ وابستہ ہے، کیونکہ یہی عناصر اسلامی اخوت، محبت اور بھائی چارے کے فروغ کا مؤثر ذریعہ ہیں۔ انہوں نے مزید کہا کہ پاکستان کو موجودہ دور میں برادرانہ تعلقات اور خیر سگالی کی فضا کی شدید ضرورت ہے تاکہ ہم معاشرتی ہم آہنگی اور امن کو فروغ دے سکیں۔
اس موقع پر پروفیسر ڈاکٹر ساجد محمود شہزاد (وائس چانسلر منہاج یونیورسٹی لاہور)، پروفیسر ڈاکٹر خرم شہزاد (رجسٹرار منہاج یونیورسٹی لاہور)، جناب خرم نواز گنڈاپور (ناظم اعلیٰ تحریک منہاج القرآن)، نائب ناظم اعلیٰ نور اللہ صدیقی، نائب ناظم اعلیٰ خیبرپختونخوا چوہدری عرفان یوسف، میجر (ر) سلمان جہانگیر اور حاجی محمد اسحاق و طیب اسلم بھی موجود تھے۔
تبصرہ