نظام المدارس پاکستان کی جانب سے بھارتی جارحیت کی شدید مذمت

آج جمعتہ المبارک کو یوم یکجہتی و سلامتی کے طور پر منایا جائے: ڈاکٹر میر آصف اکبر قادری کی اپیل
علمائے کرام،اپنے خطبات میں افواج پاکستان کی قربانیوں کو خراج تحسین پیش کریں
ہزاروں مدارس و جامعات افواجِ پاکستان کے ساتھ کھڑے ہیں: ناظم اعلیٰ نظام المدارس پاکستان

لاہور (8مئی 2025) ناظم اعلیٰ نظام المدارس پاکستان، ڈاکٹر میر محمد آصف اکبر قادری نے بھارت کی جانب سے جارحیت کی شدید مذمت کرتے ہوئے کہا ہے کہ رات کی تاریکی میں مساجد، مدارسِ دینیہ، آزاد کشمیر سمیت ملک کے دیگر شہروں کو نشانہ بنانا بزدلانہ فعل ہے۔ بھارتی جارحیت نے ایک مرتبہ پھر خطے کے امن کو خطرے میں ڈال دیا ہے۔ ان حملوں کا مقصد پاکستان کی جغرافیائی خودمختاری کو چیلنج کرنا ہے۔

ڈاکٹر میر محمد آصف اکبر قادری نے کہا کہ دشمن نے جس طرح رات کے اندھیرے میں عبادت گاہوں اور تعلیمی اداروں کو نشانہ بنایا، وہ اس کی کمزوری، بوکھلاہٹ اور اخلاقی دیوالیہ پن کا واضح ثبوت ہے۔ ایسے حملے نہ صرف بین الاقوامی قوانین اور جنگی اصولوں کی خلاف ورزی ہیں بلکہ انسانیت کے خلاف کھلی بربریت اور انتہا پسندی کا مظہر ہیں۔

ڈاکٹر میر محمد آصف اکبر نے افواجِ پاکستان کے عزم و حوصلے کو خراج تحسین پیش کرتے ہوئے کہا کہ ہماری بہادر فوج نے ہر محاذ پر دشمن کی جارحیت کا جواں مردی سے مقابلہ کیا ہے۔ اُنہوں نے کہا کہ ہم بحیثیت قوم اپنی مسلح افواج کے ساتھ شانہ بشانہ کھڑے ہیں اور ہمیں اپنی بہادر افواج پر مکمل اعتماد ہے۔ افواج پاکستان کی جرات، قربانی، استقامت اور حب الوطنی ملک کے ہر شہری کے لیے فخر اور ہمت کا باعث ہے۔

نظام المدارس پاکستان کے ناظم اعلیٰ نے واضح طور پر اعلان کیا کہ ملک بھر میں نظام المدارس سے وابستہ ہزاروں مدارس و جامعات کے ناظمین، اساتذہ، مشائخ، آئمہ، خطباء اور لاکھوں طلبہ پاکستان کی افواج کے ساتھ مکمل یکجہتی اور ہم آہنگی کے ساتھ کھڑے ہیں۔ انہوں نے اس بات پر زور دیا کہ ہر فرد کو اپنا کردار ادا کرنا ہوگا تاکہ قومی اتحاد و یگانگت کے ساتھ دشمن کو منہ توڑ جواب دیا جا سکے۔ انہوں نے نظام المدارس پاکستان سے منسلک تمام اداروں کو ہدایت کی کہ کسی بھی ایمرجنسی یا جنگی صورت حال میں فوری طور پر زخمیوں کی مرہم پٹی، ابتدائی طبی امداد (فرسٹ ایڈ)، خون کے عطیات اور دیگر فلاحی سرگرمیوں میں بھرپور حصہ لیں۔ مدارس کے منتظمین، طلبہ و اساتذہ مقامی سطح پر سول اداروں اور دفاعی اداروں کے ساتھ تعاون کرتے ہوئے قومی دفاع میں عملی کردار ادا کریں۔

ڈاکٹر میر محمد آصف اکبر نے سوشل میڈیا اور دیگر ذرائع ابلاغ کے ذمہ دارانہ استعمال کی اہمیت پر زور دیتے ہوئے کہا کہ ان جدید ذرائع کو ملک دشمن عناصر کے پروپیگنڈے کا توڑ کرنے کے لیے استعمال کیا جائے۔ ہر فرد پر لازم ہے کہ وہ اپنی گفتگو اور پیغامات میں احتیاط اور حب الوطنی کو مقدم رکھے اور افواجِ پاکستان کے خلاف کسی بھی سازش کا حصہ نہ بنے۔ علامہ ڈاکٹر میر آصف اکبر قادری نے اپیل کی کہ آج جمعتہ المبارک کو یوم یکجہتی و سلامتی کے طور پر منایا جائے۔ علمائے کرام، اپنے خطبات میں افواج پاکستان کی قربانیوں کو خراج تحسین پیش کریں اور بھارتی جارحیت کی شدید مذمت کریں۔

علمائے کرام حب الوطنی اور قومی یکجہتی کے فروغ کے موضوع پر خطابات کر کے اپنی جرات مند افواج پاکستان کو خراج تحسین پیش کریں اور ملک کی سلامتی، دفاع اور شہداء کے درجات کی بلندی کے لیے دعائیں کریں۔