بچیانہ جڑانوالہ میں ڈپلومہ اِن قرآن سٹڈیز کی پُروقار اختتامی تقریب کا انعقاد

ناظم اعلیٰ تحریک منہاج القرآن خرم نواز گنڈا پور نے خصوصی شرکت کی اور شرکاء میں سرٹیفیکیٹس تقسیم کیے

جڑانوالہ: نظامت ایجوکیشن اینڈ پروفیشنل ڈویلپمنٹ تحریک منہاج القرآن کے زیر اہتمام بچیانہ، جڑانوالہ میں 10 روزہ ڈپلومہ اِن قرآن سٹڈیز کی پُروقار اختتامی تقریب کا انعقاد کیا گیا۔ اختتامی تقریب میں ناظم اعلی تحریک منہاج القرآن خرم نواز گنڈا پور، ڈائریکٹر نظامتِ ای پی ڈی حافظ سعید رضا بغدادی، سیکرٹری کوارڈینیشن تنظیمات سنٹرل پنجاب قاری ریاست علی چدھڑ اور نظامت ای پی ڈی کے معزز ممبران علامہ محمود مسعود قادری، علامہ انجینئر محمد سرفراز قادری، علامہ حسن محمود جماعتی اور علامہ احمد وحید قادری نے خصوصی شرکت کی۔

اختتامی تقریب سے گفتگو کرتے ہوئے محترم ناظم اعلیٰ منہاج القرآن انٹرنیشنل نے فرمایا "تحریک منہاج القرآن ڈپلومہ ان قرآن سٹڈیز کے ذریعے اندرون و بیرون ملک قرآن مجید کی تعلیم کو فروغ دے رہی ہے۔ اس ڈپلومہ کا مقصد لوگوں کو قرآن مجید سے جوڑنا ہے تاکہ اس کا صحیح فہم حاصل کرکے اس سے رہنمائی لی جا سکے۔"

اس موقع پر حافظ محمد سعید رضا بغدادی نے گفتگو کرتے ہوئے کہا کہ قرآن سے تعلق صرف علم کا نہیں، عمل، اخلاق اور فکر کا بھی نام ہے۔ ہمیں اپنی زندگیاں قرآن کے نور سے منور کرنا ہوں گی۔ نوجوانوں کو مخاطب کرتے ہوئے انہوں نے اس بات پر زور دیا کہ نوجوان اپنے مقصد حیات کو پہچانیں اور علم کے ذریعے معاشرے میں روشنی کے فروغ کا سبب بنیں۔

10 روزہ ڈپلومہ اِن قرآن سٹڈیز میں نوجوانوں، اساتذہ، اور مختلف طبقات سے تعلق رکھنے والے سات سو سے زائد مرد و خواتین نے قرآن کی بنیادی تفہیم، تدبر، ترجمہ اور عملی اطلاق کے حوالے سے تربیت حاصل کی۔ تقریب کے اختتام پر ڈپلومہ مکمل کرنے والے خواتین و حضرات کو ڈپلومہ سرٹیفکیٹس بھی دیے گئے۔