تحریکِ منہاج القرآن خیبر پختونخوا کی جانب سے یونیورسٹی آف مالاکنڈ کو شیخ الاسلام ڈاکٹر محمد طاہرالقادری کی کتب کا تحفہ

وائس چانسلر یونیورسٹی آف مالاکنڈ ڈاکٹر رشید احمد نے تقریب کی صدارت کی، شیخ الاسلام دامت برکاتہم العالیہ کی کتب کے تحفے پر تحریکِ منہاج القرآن کا شکریہ ادا کیا

چکدرہ (مالاکنڈ): تحریکِ منہاج القرآن خیبرپختونخوا کی جانب سے یونیورسٹی آف مالاکنڈ کی لائبریری کو شیخ الاسلام ڈاکٹر محمد طاہرالقادری، پروفیسر ڈاکٹر حسن محی الدین قادری اور پروفیسر ڈاکٹر حسین محی الدین قادری کی 500 سے زائد کتب بطور تحفہ پیش کیا گیا۔ اس موقع پر جامعہ میں تقریب کا انعقاد کیا گیا، جس میں نائب ناظمِ اعلیٰ تحریکِ منہاج القرآن خیبر پختونخوا چودھری محمد عرفان یوسف اور نائب ناظمِ تنظیمات خیبرپختونخوا علامہ عبدالحی علوی نے خصوصی شرکت کی۔

تقریب کی صدارت یونیورسٹی آف مالاکنڈ کے وائس چانسلر ڈاکٹر رشید احمد نے کی۔ اس موقع پر ڈین فیکلٹی آف اسلامک اسٹڈیز پروفیسر ڈاکٹر عطا الرحمان، صاحبزادہ ڈاکٹر انوار محمد، مولانا بخت زمان، مولانا نثار قادری اور مولانا علیم خان بھی شریک تھے۔

ڈاکٹر رشید احمد نے تحریکِ منہاج القرآن کا شکریہ ادا کرتے ہوئے کہا کہ شیخ الاسلام ڈاکٹر محمد طاہرالقادری کی کتب طلباء کے لیے علم، تحقیق اور فہمِ دین کا نیا باب ثابت ہوں گی۔ ان کی تحریریں علمی گہرائی، فکری وسعت اور بین المسالک ہم آہنگی کا درخشندہ نمونہ ہیں، جو عصرِ حاضر کے تقاضوں کے مطابق اسلام کی حقانیت کو مدلل اور مؤثر انداز میں پیش کرتی ہیں۔ یونیورسٹی آف مالاکنڈ کی انتظامیہ اور اساتذہ نے اس علمی و فکری تحفے پر تحریکِ منہاج القرآن خیبرپختونخوا کا خصوصی شکریہ ادا کیا۔