منہاج یوتھ لیگ نے شجرکاری مہم کا آغازکر دیا، 50ہزارپودے لگانے کا اعلان
ڈی جی پنجاب روڈ سیفٹی ڈاکٹر احمد خاور،ڈائریکٹر پی ایچ اے نے پودے لگا کر مہم کا آغاز کیا
نوجوان تعلیم یافتہ اور سرسبز پاکستان کے لئے کام کریں، ناظم اعلیٰ خرم نواز گنڈاپور
پاکستان کو انتہا پسندی کے اندھیروں سے نکال کر علم کے نور سے روشن کرنا ہو گا
نوجوانوں کے عالمی دن کے موقع پر منعقدہ سیمینار سے مقررین کا خطاب
لاہور (12اگست 2025) منہاج یوتھ لیگ کی طرف سے نوجوانوں کے عالمی دن کے موقع پر شجر کاری مہم کا آغاز کیا گیا۔ ڈائریکٹر جنرل پنجاب روڈ سیفٹی اتھارٹی ڈاکٹر احمد خاور شہزاد اور ڈائریکٹر پی ایچ اے ظہیر الاسلام نے ناظم اعلیٰ خرم نواز گنڈاپور اور منہاج یوتھ لیگ کے صدر رانا وحید شہزاد کے ہمراہ پودے لگائے۔ اس موقع پر منہاج القرآن کے مرکزی قائدین اور یوتھ لیگ کے راہ نما بڑی تعداد میں موجود تھے۔
یوتھ لیگ کے صدر رانا وحید شہزاد نے اس موقع پر گفتگو کرتے ہوئے کہا کہ منہاج یوتھ لیگ کی ملک بھر کی تنظیمات مختلف اضلاع اور شہروں میں 50 ہزار پودے لگائے گی جس کے لئے انتظامات مکمل کر لئے گئے ہیں۔ ڈی جی پنجاب روڈ سیفٹی ڈاکٹر احمد خاور شہزاد نے منہاج القرآن کے مرکزی سیکرٹریٹ کے مقابل گرائونڈ میں پودا لگانے کے بعد گفتگو کرتے ہوئے کہا کہ میں ڈاکٹر طاہرالقادری کو مبارکباد پیش کرتا ہوں کہ جنہوں نے اپنے نوجوانوں کی بہترین تربیت کی ہے اور وہ آئندہ نسلوں کی بہتری کے لئے سوچ رہے ہیں۔ شجر کاری زندگی کی بقا کا مسئلہ ہے، ہر شخص کو ذات، جماعت اور اپنے مفاد سے بالاتر ہو کر پاکستان کو سرسبز بنانے کے لئے محنت کرنا ہو گی۔ ڈائریکٹر پی ایچ اے ظہیر الاسلام نے پودا لگانے کے بعد گفتگو کرتے ہوئے کہا کہ ہم منہاج یوتھ لیگ کو ہر ممکن مدد دیں گے، انہوں نے کہا کہ دیگر دینی و مذہبی جماعتیں بھی اس کار خیر میں بڑھ چڑھ کر حصہ لیں۔
ناظم اعلیٰ منہاج القرآن انٹرنیشنل خرم نواز گنڈاپور نے معزز مہمانوں کا شکریہ ادا کیا اور یوتھ لیگ کے تمام ذمہ داران کو ہدایت کی کہ وہ شجر کاری کی اس مہم کو کامیاب بنائیں۔ نوجوان تعلیم یافتہ، خوشحال اور سر سبز پاکستان کے لئے محنت کریں۔ بعدازاں نوجوانوں کے عالمی دن کے موقع پر منعقدہ سیمینار’’نوجوان پاکستان کا مستقبل‘‘ سے اظہار خیال کرتے ہوئے راہ نمائوں نے اس عزم کااظہار کیا کہ 78ویں یوم آزادی کے تاریخی موقع پر ہم اس بات کا عہد کرتے ہیں کہ پاکستان کو انتہا پسندی کے اندھیروں سے نکال کر علم کے نور سے روشن کریں گے۔ سیمینار میں ملک بھر میں تعلیم و تربیت کے مثالی ادارے قائم کرنے پر شرکائے سیمینار نے شیخ الاسلام ڈاکٹر محمد طاہرالقادری، پروفیسر ڈاکٹر حسن محی الدین قادری اور پروفیسر ڈاکٹر حسین محی الدین قادری کی شبانہ روز محنت اور سرپرستی کو سراہا۔
سیمینار سے خرم نواز گنڈاپور، انجینئر محمد رفیق نجم، راجہ زاہد محمود، ڈاکٹر خرم شہزاد،کرنل (ر) خالد جاوید، رانا وحید شہزاد، ڈاکٹر عمران یونس، کامران عثمانی، شیخ فرحان عزیز، سردار عمر دراز، مظہر محمود علوی، شکیل احمد طاہر، محمد صدام، چوہدری علی رضا نت، محسن بشیر چوہدری سمیت دیگر رہنمائوں نے خطاب کیا۔
تبصرہ