پاکستان ہمیشہ قائم رہنے کیلئے بنا ہے: شیخ الاسلام ڈاکٹر محمد طاہر القادری

تحریک منہاج القرآن کے بانی و سرپرست اعلیٰ شیخ الاسلام ڈاکٹر محمد طاہرالقادری نے 78 ویں یوم آزادی کے موقع پر قوم کے نام اپنے پیغام میں کہا ہے کہ پاکستان ایک نظریاتی و جغرافیائی ریاست ہے جو ہمیشہ قائم رہنے کیلئے بنی ہے۔ پاکستان کے روشن اور محفوظ مستقبل کی ضمانت باصلاحیت، باکردار اور محب وطن نوجوان ہیں۔ ڈاکٹر طاہر القادری نے کہا کہ وطن عزیز کی بنیاد قربانی، ایثار اور ایمان پر رکھی گئی ہے جسےکوئی بھی بیرونی یا اندرونی چیلنج کمزور نہیں کر سکتا۔ انہوں نے کہا کہ نوجوان نسل اس ملک کا قیمتی سرمایہ ہے اگر یہ نسل تعلیم، اخلاق اور مثبت کردار کو اپنا شعار بنا لے تو پاکستان دنیا میں ایک مثالی و ترقی یافتہ ملک بن سکتا ہے۔ انہوں نے زور دیا کہ نوجوان اپنے وقت کو ضائع نہ کریں، منفی سرگرمیوں کی بجائے علم، ہنر اور خدمت خلق کو اپنائیں کیونکہ یہی راستہ ملک کو مضبوط اور خودمختار بنانے کا ہے۔

انہوں نے کہا کہ آزادی ایک بیش قدر نعمت ہے اس کی قدر کی جائے۔ قدر کا بہترین طریقہ قیام پاکستان کے اغراض و مقاصد اور نصب العین پر صدق دل کے ساتھ عمل کرنا ہے۔ بانی پاکستان نے فرمایا تھا کہ ’’پاکستان اسلام کی تجربہ گاہ ہے جہاں قرآن و سنت کے سنہری اصولوں کے مطابق نظام حیات تشکیل دیا جائے گا‘‘۔ انہوں نے کہا کہ 78 ویں یوم آزادی کے موقع پر عہد کیا جائے کہ نوجوانوں کو تعلیم و تربیت دے کر خوشحال معاشرہ کی بنیاد رکھیں گے۔

دریں اثناء منہاج القرآن انٹرنیشنل کی سپریم کونسل کے چیئرمین پروفیسر ڈاکٹر حسن محی الدین قادری، پروفیسر ڈاکٹر حسین محی الدین قادری، شیخ حماد مصطفی المدنی القادری نے 78 ویں یوم آزادی پر قوم کو مبارکباد دی ہے اور اس امید کا اظہار کیا ہے کہ پاکستان ایک دن اُمت مسلمہ کا خوشحال ملک بنے گا اور اس کے نوجوان اس کا حقیقی سرمایہ ثابت ہوں گے۔