آغوش آرفن کیئر ہومز اور تحفیظ القرآن انسٹی ٹیوٹ کے زیراہتمام میلادالنبیﷺ کی خوشی میں ضیافت میلاد کا انعقاد
آغوش آرفن کیئر ہومز اور تحفیظ القرآن انسٹی ٹیوٹ کے زیراہتمام میلادالنبیﷺ کی خوشی میں ضیافت میلاد کا انعقاد کیا گیا۔ ضیافتِ میلاد میں آغوش آرفن کیئر ہوم اور تحفیظ القرآن انسٹیٹیوٹ کے طلبہ و طالبات نے حضور نبی اکرم ﷺ کی بارگاہِ اقدس میں نعتوں اور درود و سلام کے نذرانے پیش کئے۔
محفل سے خطاب کرتے ہوئے تحفیظ القرآن انسٹیٹیوٹ کے وائس پرنسپل قاری سید خالد حمید کاظمی الازہری نے کہا کہ شیخ الاسلام ڈاکٹر محمد طاہرالقادری کا ضیافت میلاد کے انعقاد کا بنیادی مقصد یہی ہے کہ رسول ﷺ کے یوم ولادت کو محبت و عقیدت اور والہانہ شوق کے ساتھ منایا جائے۔ انہوں نے کہا کہ میلاد منانے کا مطلب صرف چراغاں کرنا یا خوشی کے نعرے لگانا نہیں، بلکہ حقیقی میلاد یہ ہے کہ ہم اپنی زندگیوں کو سیرت مصطفی ﷺ کے مطابق ڈھال لیں۔
انہوں نے مزید کہا کہ حضور ﷺ کی ولادت کائنات کے لیے سب سے بڑی خوشخبری ہے، آپ ﷺ کی آمد نے انسانیت کو علم و ہدایت کی روشنی عطا کی۔ میلاد ہمیں یہ پیغام دیتا ہے کہ ہم اخوت، محبت، عدل اور رحم دلی کے پیغام کو اپنی عملی زندگی میں راسخ کریں۔
قاری خالد حمید الازہری نے اختتامی کلمات میں ضیافت میلاد میں شریک تمام مہمانوں اور شرکاء کا شکریہ ادا کرتے ہوئے کہا کہ میلاد کی بابرکت محافل دلوں کو نور ایمان سے منور کرتی ہیں اور ہمیں حضور ﷺ کی سیرتِ طیبہ پر عمل پیرا ہونے کی یاد دہانی کرواتی ہیں۔ تقریب میں راجہ زاہد محمود، غلام مرتضی علوی، بشیر احمد جان، قاری اسماعیل، قاری انعام اللہ نعیمی، قاری عبدالخالق، قاری سید تنویر حسین شاہ، محمد قاسم، محمد طیب اور آغوش کمپلیکس کے طلباء و طالبات کی کثیر تعداد نے شرکت کی۔
تبصرہ