کالج آف شریعہ اینڈ اسلامک سائنسز کی بزمِ منہاج کے زیراہتمام میلاد النبی ﷺ کی خوشی میں محفلِ نعت اور ضیافتِ میلاد کا انعقاد

منہاج القرآن انٹرنیشنل کے مرکزی سیکرٹریٹ میں بزمِ منہاج کے زیر اہتمام میلاد النبی ﷺ کی خوشی میں محفلِ نعت اور ضیافتِ میلاد کا اہتمام کیا گیا، جس میں عرب ممالک سے تشریف لائے ہوئے شیوخِ کرام فضيلة الشيخ الأستاذ الدكتور أحمد بدرة اور فضيلة الشيخ الدكتور عبد الملك البرودي نے خصوصی شرکت کی۔

تقریب کا آغاز تلاوتِ کلامِ رحمن سے ہوا جس کی سعادت قاری محمد اکرام ربانی نے حاصل کی۔ اس موقع پر محمد عبدالصبوح، احمد مصطفیٰ قادری، عاطف برادران، سبحان علی سعیدی، احمد محی الدین، حافظ محمد نوید نقیبی، حافظ ارشد نقشبندی سمیت دیگر نعت خواں حضرات نے حضور نبی اکرم ﷺ کی بارگاہِ اقدس میں ہدیۂ نعت اور درود و سلام پیش کیا۔

ہیڈ آف عربک ڈیپارٹمنٹ منہاج یونیورسٹی لاہور، پروفیسر ڈاکٹر شفاقت علی بغدادی الازہری نے خطاب کرتے ہوئے کہا کہ ذکرِ مصطفیٰ ﷺ اَزل تا اَبد جاری و ساری ہے۔ اللہ رب العزت نے آپ ﷺ کا چرچا آپ ﷺ کو وجود میں لانے سے بھی بہت پہلے کر دیا تھا۔ عرشِ بریں پر اپنے نام کے ساتھ آپ ﷺ کا نام رقم کیا۔ جنت کے پتے پتے پر آپ ﷺ کا اِسم گرامی جلوہ گر رہا۔ فرشتے آپ ﷺ کا نام جپتے رہے۔ آج اگر اُمتِ مسلمہ آپ ﷺ کی ولادت باسعادت کے واقعات کو تصوّر و تخیل میں لا کر آپ ﷺ کی آمد کی خوشی میں محافل کا اِنعقاد کرتی ہے تو یہ اُسی نوری سلسلہ کی ایک کڑی ہے جو اَزل تا اَبد جاری رہے گا۔ یہ محبوب و پسندیدہ عمل ہے۔ لہٰذا آپ ﷺ کے میلاد کی خوشی میں ضیافت کرنا، صدقہ و خیرات کرنا، روشنیوں کا اِہتمام کرنا، قمقمے روشن کرنا، مشعل بردار جلوس نکالنا اور دل کھول کر خرچ کرنا بارگاہِ اِلٰہی میں مقبول اور اُس کی رضا کا باعث ہے۔ اُمتی حضور ﷺ کی ولادت پر خوش ہوں گے تو اللہ تعالیٰ اُن سے خوش ہوگا۔

تقریب کے اختتام پر حضور نبی کریم ﷺ کے یومِ ولادت کی خوشی میں کیک کاٹا گیا اور عرب سے آئے ہوئے معزز مہمان فضيلة الشيخ الأستاذ الدكتور أحمد بدرة نے اختتامی دعا کرائی۔

تقریب میں پروفیسر ڈاکٹر محمد ممتاز الحسن باروی، انجنیئر محمد رفیق نجم، ڈاکٹر محمد اکرم رانا، پروفیسر ڈاکٹر فیض اللہ بغدادی، ڈاکٹر مسعود احمد مجاہد، صابر حسین نقشبندی، محمد ساجد الازہری، محمد جمیل حیدر الازہری، محمد عظیم الازہری، حافظ محمد ابوبکر، محمد سعد اللہ الازہری، محمد احمد شاہ، فیض المصطفیٰ، میاں انصر محمود، صائمہ نور، عائشہ بتول، جویریہ افضل، حنا فاطمہ، طیبہ کوثر، ثمینہ شہباز، قرۃ العین زینب، وردہ ناز سمیت کالج آف شریعہ اینڈ اسلامک سائنسز کے اساتذہ، طلباء و طالبات اور خواتین کی بڑی تعداد نے شرکت کی۔