تحفیظ القرآن انسٹیٹیوٹ کے زیراہتمام عالمی فنِ قراءت کورس، محفل ٹی وی سے بین الاقوامی قراء کی خصوصی شرکت

جامع المنہاج، آغوش کمپلیکس لاہور میں منہاج انسٹیٹیوٹ برائے قراءت و تحفیظ القرآن کے زیراہتمام اور محفل ٹی وی (تہران) کے تعاون سے عالمی فنِ قراءت کورس کا انعقاد کیا گیا۔ اس عظیم قرآنی پروگرام میں محفل ٹی وی ایران سے بین الاقوامی شہرت یافتہ قراء کرام — شیخ القراء قاری حامد شاکر نژاد، قاری صالح مہدی زادہ اور قاری حسنین جعفر حسن الحلو نے خصوصی شرکت کی۔ انہوں نے نہ صرف روح پرور تلاوت سے محفل کو منور کیا بلکہ فنِ قراءت کی تکنیکی باریکیوں پر تدریسی گفتگو بھی کی، جس سے شرکاء کو علمی و فنی طور پر بھرپور استفادہ حاصل ہوا۔

کورس میں پاکستان کے 50 سے زائد شہروں اور مختلف مکاتب فکر کے 100 سے زائد مدارس و بورڈز سے تعلق رکھنے والے تقریباً 300 طلبہ، قراء اور اساتذہ نے بھرپور شرکت کی۔ تقریب میں منہاج القرآن کے مرکزی قائدین میں سہیل احمد رضا (ڈائریکٹر انٹرفیتھ ریلیشنز)، کرنل (ر) مبشر اقبال (ڈائریکٹر آغوش کمپلیکس)، علامہ محمد عباس نقشبندی (پرنسپل ادارہ) اور قاری خالد حمید کاظمی (وائس پرنسپل) سمیت انسٹیٹیوٹ کے اساتذہ و طلبہ کی بڑی تعداد شریک ہوئی۔

اس موقع پر سہیل احمد رضا نے محفل ٹی وی اور تمام معزز مہمان قراء کرام کا شکریہ ادا کیا اور ایسے علمی و روحانی پروگرامز کے تسلسل کو وقت کی اہم ضرورت قرار دیا۔