ُپروفیسر ڈاکٹر حسن محی الدین قادری کا رحمت للعالمین اتھارٹی کے زیراہتمام منعقدہ یوتھ کنونشن سے خطاب
رحمت للعالمین اتھارٹی کے زیراہتمام منعقدہ یوتھ کنونشن سے فکر انگیز خطاب
نوجوان ہر علم حاصل کریں مگر سیرت طیبہ ؐکے مطالعہ کو اپنا معمول بنائیں
منہاج القرآن انٹرنیشنل کی سپریم کونسل کے چیئرمین پروفیسر ڈاکٹر حسن محی الدین قادری نے رحمت للعالمین اتھارٹی پاکستان کے زیراہتمام منعقدہ یوتھ کنونشن سے اپنے فکر انگیز خطاب میں نوجوانوں پر زور دیا کہ وہ ہر طرح کے علوم و فنون سیکھیں مگر سیرت طیبہ کے مطالعہ کو اپنا معمول بنائیں، سیرت طیبہ انسانوں سے محبت کرنا سکھاتی ہے، انہوں نے اپنے خطاب میں کہا کہ آپ ﷺ شخصیت کے تین پہلو ایسے ہیں جن پر عمل کرنے سے ہم لاتعداد سماجی و معاشرتی عوارض سے محفوظ رہ سکتے ہیں (1) درگزر سے کام لینا(2) نیکی اور بھلائی کی تعلیم دیتے رہنا (3) جاہلوں سے بحث و تکرار سے بچنا۔ یہ تین اوصاف انسان کو صراط مستقیم پر چلانے کا نسخہ کیمیا ہیں۔ اللہ رب العزت نے اپنے محبوب پیغمبر کو ان تین چیزوں پر عمل کرنے کا حکم دیا۔
ڈاکٹر حسن محی الدین قادری نے کہا کہ آپ ﷺ کی پیدائش سے لے کر وصال تک ظاہری حیات کے تمام احوال و واقعات اور معاملات آپ ﷺ کی سیرت طیبہ ہیں۔ آپ ﷺ کی سیرت طیبہ کے بارے میں خود بھی آگاہی حاصل کریں اوردوسروں کو بھی اس کی تحریک اور تعلیم دیں،یہ عمل عبادت ہے۔ تاجدار کائنات ﷺ کے معمولات اور اخلاقیات جاننا بطور اُمتی ہم پر واجب ہے۔ آپ ﷺ کی سیرت طیبہ سے پتہ چلے گا کہ یتیموں، بیواؤں کے کیا حقوق ہیں، حلال و حرام کیا ہے، والدین، اساتذہ، عزیز و اقارب، دوستوں اور اقلیتوں کے کیا حقوق ہیں اور اچھا اخلاق حلم، بردباری، اعتدال اور رواداری کسے کہتے ہیں۔
ڈاکٹر حسن محی الدین قادری نے کہا کہ نوجوان اپنی گفتگو میں مغربی فلاسفر، حکماء، ادبا کے اقوال نقل کرتے ہیں جبکہ آپ ﷺ کی حکمت و بصیرت کی گواہیاں قرآن مجید کے ہر ہر حرف سے ملتی ہیں، نوجوان احادیث اور اقوال رسول اللہ ﷺ کو ازبر کریں اور اپنی گفتگو میں شامل کریں۔ آپ ﷺ کی محبت ہی اسلام اور اصل ایمان ہے۔
یوتھ کنونشن میں مختلف یونیورسٹیز اور کالجز کے طلباء و طالبات نے شرکت کی، تقریب میں رحمت للعالمین اتھارٹی کے چیئرمین خورشید ندیم نے چیئرمین سپریم کونسل کو خوش آمدید کہا،ناظم اعلیٰ منہاج القرآن انٹرنیشنل خرم نواز گنڈاپور، ناظم اعلیٰ نظام المدارس پاکستان ڈاکٹر میر آصف اکبر، نائب ناظم اعلیٰ چودھری عرفان یوسف، منہاج یوتھ لیگ کے صدر رانا وحید شہزاد، مصطفوی سٹوڈنٹس موومنٹ کے صدر شیخ فرحان و دیگر نے شرکت کی۔
تبصرہ