پروفیسر ڈاکٹر حسن محی الدین قادری کا جامع شیخ الاسلام میں خطبہ جمعۃ المبارک کے موقع پر خُلقِ مصطفی ﷺ کے موضوع پر خطاب

منہاج القرآن انٹرنیشنل کی سپریم کونسل کے چیئرمین پروفیسر ڈاکٹر حسن محی الدین قادری نے جامع شیخ الاسلام میں خطبہ جمعۃ المبارک کے موقع پر خُلقِ مصطفی ﷺ کے موضوع پر پُراثر خطاب کیا۔

ڈاکٹر حسن محی الدین قادری نے کہا کہ خُلق کا مطلب طبیعت اور مزاج ہے۔ قرآن مجید میں اللہ تعالیٰ نے اپنے حبیب ﷺ کے اخلاقِ عظیم کو بیان کرتے ہوئے فرمایا: خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ [الاعراف: 199]، یعنی "اے حبیبِ مکرم ﷺ! درگزر اختیار کیجیے، بھلائی کا حکم دیجیے اور جاہلوں سے کنارہ کش رہیں۔"

انہوں نے کہا کہ حُسنِ خُلق یہ ہے کہ انسان اپنے اندر تمام نیک خصائل کو جمع کرے۔ جسے آنکھیں دیکھیں وہ خِلقت ہے اور جسے دل دیکھے وہ خُلق ہے۔ صوفیاء کے نزدیک انسان اپنی خِلقت کے اعتبار سے چھپا ہوا ہے مگر اپنے اخلاق کے باعث پہچانا جاتا ہے۔

ڈاکٹر حسن محی الدین قادری نے سیدہ عائشہ رضی اللہ عنہا کا فرمان بیان کیا کہ "قرآن ہی حضور ﷺ کا اخلاق ہے"۔ اس پر ائمہ و محدثین نے وضاحت کی کہ جس طرح قرآن کی معانی و معارف کی کوئی حد نہیں، اسی طرح اخلاق و سیرتِ مصطفی ﷺ کی بھی کوئی حد نہیں۔

انہوں نے مزید کہا کہ حضور نبی اکرم ﷺ کی حیاتِ طیبہ سراپا رحمت، شفقت، سچائی، عفو و درگزر، انکساری اور عدل و احسان سے مزین تھی۔ دشمنوں کے ساتھ نرمی، غلاموں کے ساتھ مساوات، بچوں سے محبت، عورتوں کا احترام اور ہر مظلوم کی حمایت آپ ﷺ کے اخلاقِ عظیمہ کا حصہ تھی۔ آپ ﷺ کی سیرتِ مبارکہ ہمیں سکھاتی ہے کہ اخلاقِ حسنہ ہی روحانی بلندی اور رب کی رضا کا ذریعہ ہیں۔