پروفیسر ڈاکٹر حسن محی الدین قادری کا ایبٹ آباد پبلک اسکول کا دورہ

منہاج القرآن انٹرنیشنل کے چیئرمین سپریم کونسل پروفیسر ڈاکٹر حسن محی الدین قادری نے ایبٹ آباد پبلک اسکول کا خصوصی دورہ کیا۔ یہ سکول ناظمِ اعلیٰ منہاج القرآن انٹرنیشنل خرم نواز گنڈاپور کا مادرِ علمی ہے۔ اس موقع پر پرنسپل ایبٹ آباد پبلک اسکول اختر علی قریشی نے معزز مہمانوں کا پرتپاک استقبال کیا اور ادارے کے انتظامی و تعلیمی امور پر تفصیلی بریفنگ دی۔ انہوں نے بتایا کہ ایبٹ آباد پبلک اسکول گزشتہ چھ دہائیوں سے علمی و تربیتی میدان میں نمایاں خدمات انجام دے رہا ہے اور ملک کے مختلف شعبہ جات کو باصلاحیت قیادت فراہم کر رہا ہے۔

پروفیسر ڈاکٹر حسن محی الدین قادری نے گفتگو کے دوران بتایا کہ تحریکِ منہاج القرآن گذشتہ چار دہائیوں سے علم، کردار اور خدمتِ انسانیت کے فروغ میں سرگرمِ عمل ہے۔ انہوں نے بتایا کہ منہاج یونیورسٹی لاہور میں ایشیا کی پہلی روبوٹک لائبریری قائم کی گئی ہے، جب کہ وہاں ایک جدید روحانی و فکری مرکز بھی قائم ہے جو طلبہ کی فکری، اخلاقی اور روحانی تربیت میں نمایاں کردار ادا کر رہا ہے۔ انہوں نے مزید کہا کہ کالج آف شریعہ اینڈ اسلامک سائنسز جامعہ الازہر مصر سے الحاق شدہ ادارہ ہے، جہاں ایسے علماء و محققین تیار کیے جا رہے ہیں جو بیک وقت دینی و عصری علوم سے آراستہ ہیں۔

دورے کے اختتام پر پروفیسر ڈاکٹر حسن محی الدین قادری نے پرنسپل اختر علی قریشی کو اپنی اور شیخ حماد مصطفیٰ المدنی القادری کی تصنیف شدہ کتب بطور تحفہ دیا اور انہیں منہاج القرآن کے مرکزی سیکرٹریٹ لاہور کے دورے کی دعوت دی۔ بعد ازاں پرنسپل اختر علی قریشی نے چیئرمین سپریم کونسل اور ناظمِ اعلیٰ کو اسکول کے اکیڈمک بلاک سمیت مختلف شعبہ جات کا تفصیلی دورہ کروایا۔

ملاقات کے دوران ساجد ممتاز خان، ایڈووکیٹ مظہر قریشی، قاضی فیض الاسلام، ڈاکٹر جہانگیر خان عباسی اور کامران سہیل ایڈووکیٹ بھی موجود تھے۔