آغوش کمپلیکس میں ایک روزہ ریسکیو تربیتی ورکشاپ کا انعقاد

تربیتی ورکشاپ کا اہتمام ریسکیو1122 کے اشتراک سے کیا گیا، ماہر ریسکیو افسران کی شرکت
طلبہ اور اساتذہ کوہنگامی صورتحال سے نمٹنے کےلئے عملی تربیت دی گئی
تعلیم صرف نصابی کتب تک محدود نہیں بچوں کو عملی زندگی کی مہارتیں بھی سکھانا اہم ہے
کرنل(ر) مبشر اقبال، عمران ظفر بٹ، رومانہ مبشر، عبد الباسط کا تربیتی ورکشاپ سے خطاب

لاہور(19مئی 2025) تحریک منہاج القرآن کے فلاحی ادارہ آغوش کمپلیکس میں ایک روزہ ریسکیو تربیتی ورکشاپ کا انعقاد کیا گیا۔ جس کا مقصد طلبہ اور اساتذہ ہنگامی صورتحال سے نمٹنے کےلئے ضروری معلومات اور عملی تربیت فراہم کرنا تھا۔ اس تربیتی ورکشاپ کا اہتمام ریسکیو1122 کے اشتراک سے کیا گیا، جس میں ماہر ریسکیو افسران نے شرکت کی۔

تربیتی ورکشاپ کا آغاز تلاوت قرآن پاک اور دعائیہ کلمات سے ہوا جس کے بعد پرنسپل آغوش گرائمر سکول عمران ظفر بٹ اور وائس پرنسپل رومانہ بشیر نے استقبالیہ کلمات میں مہمانان گرامی کا خیر مقدم کیا اور ورکشاپ کی اہمیت پر روشنی ڈالی۔

ریسکیو1122کے ماہرین نے طلبہ و اساتذہ کو ابتدائی طبی امداد(فرسٹ ایڈ)، آتشزدگی کے دوران حفاظتی تدابیر،زلزلہ کے وقت احتیاطی اقدامات اور ہنگامی انخلا کے طرقیہ کار کے بار ے میں تفصیلی بریفنگ دی۔ عملی مظاہرے کے ذریعے ماہرین نےآگ بجھانے والے آلات، زخمیوں کو ابتدائی طبی امداد فراہم کرنے اورفوری ردعمل کے عملی طریقے سکھائے۔

آغوش کے بچوں نے جوش و خروش سے حصہ لیا اور ریسکیو ٹیم کی رہنمائی میں مختلف مشقوں میں بڑھ چڑھ کر شرکت کی۔تربیتی ورکشاپ کی صدارت آغوش کمپلیکس کے ڈائریکٹر کرنل (ر) مبشر اقبال نے کی۔

اس موقع پر خطاب کرتے ہوئے کرنل (ر) مبشر اقبال نے کہا کہ آغوش میں زیرِ تعلیم بچے صرف طالبعلم نہیں بلکہ قوم کے مستقبل کے معمار ہیں۔ ان کی جسمانی، ذہنی اور اخلاقی تربیت کے ساتھ ساتھ انہیں ہنگامی حالات سے نمٹنے کے قابل بنانا ایک قومی فریضہ ہے۔ انہوں نے کہا کہ ہمیں خوشی ہے کہ ریسکیو سکاؤٹس نے بچوں کو نہ صرف طبی تربیت دی بلکہ خدمتِ خلق کا شعور بھی اجاگر کیا۔

انہوں نے مزید کہا کہ یہ ورکشاپ بچوں کے اندر اعتماد، خود انحصاری اور سماجی ذمے داری کا احساس بیدار کرنے میں مددگار ہو گا۔ انہوں نےکہا کہ تعلیم صرف نصابی کتب تک محدود نہیں ہونی چاہیے بلکہ بچوں کو عملی زندگی کی مہارتیں بھی سکھانا اہم ہے۔ اس سیشن کے ذریعے بچوں کو حادثے کی صورت میں فوری ردعمل دینے اور انسانی جان بچانے کی بنیادی تربیت حاصل ہوئی، جو ان کی شخصیت سازی میں انتہائی اہم کردار ادا کرے گی۔ انہوں نے مزید کہا کہ آج کا تربیت یافتہ بچہ کل کو پورے معاشرے کی مدد کر سکتا ہے۔

ریسکیو سکاؤٹس 1122کے انسٹرکٹرز نے سادہ اور سمجھ میں آنے والی زبان میں بچوں کو تربیت دی۔ انہوں نے CPR کی مشق خود کروائی اور بچوں کو سمجھایا کہ دل بند ہونے کی صورت میں کیسے بروقت دباؤ دے کر زندگی بچائی جا سکتی ہے۔ اسی طرح اگر کسی کو زخم آ جائے یا خون بہنے لگے تو پٹی باندھنے، دباؤ دینے اور خون روکنے کی بنیادی تدابیر سکھائیں گئیں۔ بچوں کو آگ لگنے کی صورت میں “Stop, Drop and Roll” کا عملی مظاہرہ بھی کروایا گیا۔

حادثے کی صورت میں فوری طور پر ایمرجنسی نمبر 1122 پر کال کرنے کے اصول بھی سکھائے گئے۔ بچوں کو بتایا گیا کہ کال کرتے وقت انہیں اپنا نام، مقام، حادثے کی نوعیت اور متأثرہ افراد کی تعداد واضح طور پر بتانی چاہیے تاکہ بروقت مدد پہنچ سکے۔ اس سیشن کا مقصد بچوں میں گھبراہٹ کے بجائے ہمت، سمجھ داری اور فوری ردعمل کی تربیت دینا تھا۔ آغوش انتظامیہ نے تربیتی سیشن کے اختتام پر ریسکیو ٹیم کا شکریہ ادا کیا اور شیلڈز پیش کیں۔ انہوں نے اس خواہش کا اظہار بھی کیا کہ آئندہ بھی ایسے سیشن باقاعدگی سے منعقد کیے جائیں تاکہ بچوں کی تربیت ہر پہلو سے مکمل ہو۔

تقریب کے اختتام پر اجتماعی دعا کی گئی جس میں بچوں کی ترقی، ملک کی سلامتی، اور فلاحی اداروں کی کامیابی کے لیے خصوصی دعائیں کی گئیں۔ ورکشاپ میں ریسکیو سکاؤٹس کے افسران، آغوش کے اساتذہ، انتظامیہ، اور بچوں کی بڑی تعداد نے شریک تھی۔